通常我都先到，我們一行十人獲安排至一房間，被帶到那裡，嗯，這裡價錢肯定唔少野。
係，房入面就擺左滿天神佛。跟住前菜幾碟，有兩款，唔係咸脆花生，而係：
芥末八爪魚，另外呢個香辣魚仔乾，好味到爆！
湯底選兩個，第一個佢寫到明正牌水佬榮花甲鍋，睇過：
估佢唔到係蕃茄味，見到果陣期望稍稍降低，雖然花甲好大隻，肉好甜，不過個湯去到最後呢．．．再講！另外係四川麻辣：
賣相先聲奪人，食落就絕對上癮！呢種麻辣好到家，而唔霸道，但你食每一件個咀同舌頭會有麻既感覺，但又辣得好香，好耐無食過咁高質素麻辣喇！湯底出色，食物又如何？
首先，此處每碟食物都擺得好靚，都有花花伴碟，份量唔算大，但好唔好食先係重點嘛！不如，先介紹丸同餃丫！
呢個叫麻辣蝦餃，首先真係皮薄大大粒，而且蝦鮮，食食下你就發覺點解個咀麻架呢？幾過癮架。
芥末八爪魚丸，唔會成口粉好足料，而且真係有Wasabi既辣，得架！
蟹籽蝦丸，又係勁足料，好正。
雲吞魚皮餃都好高水準，但你睇呢個水餃！真係不得了！
其他食材基本上高分無乜令人失望，不過我最主力想介紹，牛！一入門口有個位有師傅跟Order切牛，上檯果幾碟，真係好鬼勁！
呢個叫肥牛邊位，肥，唔在講，牛味亦濃果下好野。
花雕牛柳粒，侍應講到明要淥廿五分鐘，呢個期望太大，普通啦。
呢個係牛肩位，牛味極濃，以為食到最正，點知有個仲正：
牛腋下，嘩，嫩滑到會自動滑落喉嚨，牛味就無咁濃，但真係超好食。同檯老饗話：上面果味就風韻尤存，呢碟就妙齡少女，喎。
千呼萬喚牛舌心，夠薄又夠牛味，不過都幾貴。
點解咁多野唔介紹介紹呢樣呢？係呀，鱔片好正，花膠好正，不過呢個烏冬好滑，加上最後唔辣果邊湯底，甜到呢．．．淥烏冬真係一絕，超好食！
咁食法，唔平架，加埋叫左既飲品，落樓位位三百幾，不過坐得舒服，食得好又精，久不久咁滾法好過去食五六次太刻薄啦！
下次有機會要試下刺身，今次食唔到牛刺身，亦聽聞此店刺身好唔錯。
沒有留言:
發佈留言