另類手信

今早終於有空，到火炭探望認識超過廿年的好同學，因為他兩個月前剛剛做爸爸，我這個Uncle亦是第一次見這小朋友。這小朋友跟他的爸爸很像樣，兩個月已經幾重手，肯定同學跟太太樂透了。

我除了帶些衣服作小禮物給這世姪之外，估不到意外地為同學一家帶來一份更有用的手信。


話說我發現同學正在Nowtv看NBA，我自然反應就問：依家俾緊幾錢？他原來是去年十月才安裝超強體育組合，還有一年才約滿，無高清盒，要二百九。我告訴他，應該有得減。

於是，吃過午飯後，回到他家中，我教他致電上電盈，問：「好似你地依家D Plan有得減價播。」該女職員核對過他的約還有一年，告訴他：「有，減到二百蚊，依家所有台都睇到，簽十八個月。」

然後我叫他問：「有冇得送高清盒？」「要加三十八蚊。」

我忍不住出手了。

「小姐，咁有冇睇多幾個台，月費去到某個價錢送高清盒？」

她Check過之後，回覆：「先生唔好意思，因為仲有成年約，依家只有呢個優惠。」

「唔係播，我朋友仲有七個月約滿，都可以有呢隻計劃，唔知訂多幾個台就送高清盒播！」

其時間，我跟同學夫婦表示，他們的情況比較蝕底，還有一年約，電盈不會So給他們的。

「先生唔好意思呀，我問過經理喇，佢話至多可以咁。」

「咁小姐，我想問，到時約滿前幾耐我可以打上黎同你地問有冇其他優惠既Deal呢？」

「至少都要三四個月前約滿先有得傾。」

「唔係播，我前排朋友真係約滿七個月打上黎都有得傾播。」注意，真有其事也好，作大也好，點都要大一大佢。

「真係無呀先生，有我都俾左你想你續長ｄ約啦。」

「咁呀，我考慮下先啦，有需要打番上黎俾你地啦。」明知暫時最平都係兩舊水，實在無必要即時決定，佢急你唔急。

「先生咁我俾我直線你啦，有需要你打番俾我啦。」

「唔駛啦小姐，既然你都話最平係呢個，我幾時打上黎搵你地邊個都一樣嗟，你話你有更著數既plan俾我，我就打番俾你嗟，係咪？」

當然係，不過佢地當然想要業績，箍得一個客得一個客。

這時候，該名小姐的確無言，然後我接住上：「咁啦，你一係幫我再問下有冇好Ｄ既優惠，然後你打番俾我啦。」

於是，我留了同學的手電給他，同時吩咐同學，十一月完結前無人打黎，自動打去要番個二百蚊Plan算，起碼一年平成千蚊。

同學立即向兩個月大的兒子說：「仔呀仔，以後有乜野要Deal記住搵Uncle學野呀。」

我告訴他們：「係呀，我細佬話我係專業刁民，但其實佢攪錯左，我係專業Dealer。」

就這一次出手，至少幫同學慳一筆，同時現場示範如何向這些供應商搵著數。