哥前哥後都講錢

今日明報報導：大埔恩主教中學一名中二學生，在午飯抑或小息時，拿出四萬大元港幣與及八部挨瘋，只要同學走過來叫他一聲『軒哥』就有錢收，目的，聽聞是要威威令心儀女同學愛上他。

事件當然立即被學校阻止，據某討論區表示，挨瘋或錢都要全部交還，不過我相信總有得益者成功獲利。嗯，無記認，做乜囉番出黎。

學校如何處理我們並不知道，不過這筆四萬大元是軒哥祖母給他買野食的錢。

嗯，祖母縱孫不稀奇，俾錢佢都唔奇，問題係：祖母係咪真係現兜兜俾四萬蚊個孫黎買野食呢？

四萬蚊，如果以最低工資時薪廿八，每日上班八小時，每月上班廿八天，要上班超過六個月先有接近四萬蚊收入。四萬蚊，同時亦夠我讀一年Part time degree有多，仲有成皮野去旅行去玩去食。

祖母點解俾錢俾得咁豪，父母又有無與軒哥多溝通，了解佢需要，開心唔開心，定係覺得有錢俾佢駛就可以彌補兒子欠缺的愛呢？

不過幾多錢不重要，重要是：點解軒哥咁有趣，諗到派錢贏女芳心呢一招呢？

電視劇有冇？嗯．．．唔係無，不過應該係豪花於心儀女性身上，就算有類似，都唔係呢個年代電視劇，至多出現既係「係酒吧呢一Round我既」，派錢？真係無乜印象。

抑或唔知邊個同學貢獻呢條屎橋呢？定係佢心儀果位妹妹仔曾經話過：「如果有成班人叫佢軒哥我就鍾意佢啦！」不過要有呢個效果，請成班人食餐勁玩餐勁都夠啦。

咁，問題出在哪裡？

有學者認為：反映學生被社會物質主義引導，誤以為「派錢」可換取友誼和尊重，並指這並非個別事件。

首先，香港物質主義行先已經係事實，斷不能相信一個中二生唔會被物質主義同化：不妨留意街上年青人，或者初中生，拿著挨瘋科大有人在，名牌衫褲鞋襪分分鐘有你半份糧著上身，慢慢開始大家睇慣左，唔會覺得係乜野一回事，在乎的可能係該名年青人的態度與行為。

其次，老老實實，現實社會有錢有面子已經是不爭事實：東華籌款、大學學院命名等等，你無錢，邊個睬你？

所以，以上呢位學者真係幾廢話，我相信最重要著眼點係：家長與教師，如何教導學生面對錢財與及處理錢財。

信我，我深信一個香港長大的小朋友，斷不會以為錢可以收買友情關係與愛情－－我當然是指讀書年代。

希望學校也好家長也好，好好與軒哥溝通一下，教他如何駛錢與何識朋友甚至如何結識異性，切勿責罵。