越寫越失憶因為隔太耐，所以決定介紹呢兩間餐廳就完呢個高雄親子遊。其實仲有一個景點：黃金菠蘿城堡，絕對適合一家大細去，因為俾錢參觀再參加DIY鳳梨酥製作，之後就可以囉走自己製成品，而票尾買手信仲有折，非常推介大家去。
介紹呢兩間餐廳，係因為都係好台灣古早味，而且幾好食又唔貴！
驛站食堂係我一直打算去，而當日參觀完工科館，落極極極大雨，無的士，等巴士半粒鐘一架車都無，結果見雨細少少，三大兩細就行左足足半粒鐘，中間休息一下，到達驛站食堂。此店並不易找，但幾位大小團友，到達後一有野食，立即無投訴。
餐廳本身裝修就係早期台灣，所以，極多打卡點。而當時外面又再落大雨，所以，雨聲好大，店無冷氣而非常涼快，感覺好不一樣。
因為已經係三個幾月前既事，我盡量介紹食過乜，不過我好肯定記得，餐牌上好多我想點，而我地結果點左好幾款，食晒，好滿足：
黃金豆腐，即係咸蛋黃玉子豆腐，考功夫既地方係，脆漿薄而香口不油膩，好味到收唔到手。
蔥爆豬肉，夠鑊氣，好送飯！遠遠見唔見有豬油撈飯？極掂。
炒小卷，新鮮呀，所以又彈牙又鮮甜。
薑絲鵝腸，乃三名成人至愛，爽口好食，完全一條都無剩，薑絲都全部食晒。
海鮮炒米粉，又係唔油膩料又多又新鮮，米粉係新竹果隻極幼身，好味！
蜆仔湯，請小朋友一試然後愛上，佢地無諗過望落咁清淡原來咁清甜，蜆仔就更加無得頂啦！
（好似係）招牌炒飯，見到架啦，炒得好乾身，好味！
此店，我下次再去高雄，一定會再去，不過要記住，人地收得好早，八點幾收舖，要食，留意營業時間。
圓愙驛棧小館係去完整鳳梨酥行出黎係附近客家文化園區既餐廳：
睇落做遊客生意，但抵食又好食，無理由唔介紹你地架！
客家小炒，料又多又香口惹味，收汁收得好好！
菜甫煎蛋，兩位小朋友表示好喜歡，家常菜得黎又不油膩。
炒腊肉，呢款就至岩我喇，重口味得黎果種咸香係好出色既！
炒青菜之外，肉丸湯係驚喜：手打肉丸極好食，小朋友可能唔鍾意入面有芹菜，但真係好味，而且好多粒。以上咁多樣加埋飯，個套餐我記得極划算，大家又坐得舒服食得開心。
是真的，唔好理發大財，高雄真係好適合一家大細出遊，地方比台北大而且無咁多人，交通都方便，小朋友適合去既地方又多，大家不妨考慮一下。
沒有留言:
發佈留言