高雄親子遊：鈴鹿賽車場

此處我覺得若果閣下的小朋友有十歲或樓上，佢地會非常喜歡；若果小朋友七或八歲，可能佢會恨下一次再黎；若果是大朋友幾個的話，都一樣會喜歡，因為可以名正言順片車。

鈴鹿賽道樂園係日本黎台灣開，除左有不同Level賽車之外，商場一樣有野玩，基本上玩足一日係可以的。但正如我之前所講，有部份遊戲有高度限制，我就唔建議買全票喇，去到，睇清睇楚，有乜岩玩先買啦。

乘搭高雄捷運於草衙站二號出口一出就見，要注意樂園開放時間，平日開十一點，太早去係無用既。唔想小朋友掃興，可以先做少少功課：呢度非常好，旁邊可以話你知，幾高幾高可以玩乜。

兩個姪女分別九歲及十一歲，首先就玩左甩尾小車手，大人可以陪同，夠1.2米高可以自己駕駛。唔會係龜速因為係可以爬頭。搵到網上片段大家睇下：

大姪女就夠高所以後來佢係玩埋飄移高手。我覺得呢個以小朋友玩算係幾快幾刺激，至少我在外面睇都覺得快！呢個係唔駛再上堂既，對於小朋友來講是非常過癮的。

睇下網上片段先：

若果夠高喇，就當然玩迷你鈴鹿賽道啦！無車牌咩？可以俾錢上半粒鐘堂就可以玩！目擊見到是非常快，若果幾個朋友黎，係有好抵既套票三個人玩三次！下次若果同同學去高雄真係要試試呢個！

小朋友可以玩咩呢？除左小火車與及小小騎士，一家幾口係有一個好岩玩既星際戰場！只要儲夠人就可以兩隊入去玩虛擬射擊。細佬一家四口入去玩完出黎大呼過癮！

好喇，樂園入面有兩個商場東西翼，好多餐廳，我地當日就選左聚。北海道昆布鍋，套餐非常抵食，而且湯底靚用料亦靚，送上既冰沙絕對一讚，最後甜品更加不得了！

其實商場入面，仲多野玩！

首先，有類似歡樂天地既寶寶尼歡樂世界，你黎到會發現，點解錢咁好駛？無論玩遊戲夾公仔都比香港便宜好多好多好多！所以你會無端端俾小朋友玩落去，自己又玩埋一份。另外一定要去太魯閣棒疊球打擊場！大人想打棒球想玩投球全部都有（又係喪平），小朋友一樣有遊戲可以玩！

其他地方仲有一樓既We Sport遊戲場，有迷你籃球場，哥爾夫球場及滑輪場，仲有我地都無入去既VR遊戲中心，有書店，你話是咪可以玩足一日先？

我家兩名小朋友已經話，希望再大個再高可以黎多次！