懷舊B級港產片：大叔的愛Love Or Dead

我知，日劇的電影版，十套有八套都出事，當中唔難睇有前後呼應已經叫好彩，更多是擺到明昆你入場就算。《大叔的愛》在去年如何爆，七集如何好睇，我都寫過了。然後一年之後，電影版終於出現。

我寫了我知的，所以入場純粹因為有睇開，而且那張續會贈券快到期了，所以選了。結果，我知你同香港旅遊協會合作（都只係開首有Ｄ香港景而且唔知Sell左乜野旅遊景點咁巴閉），似乎導演應該好鍾意睇香港十幾廿年前港產笑片，仲係要Ｂ級果隻質素。

咁春田田（田中圭）去完上海之後黎左香港工作準備番日本，臨走有段無聊港式動作片追戒子戲啦，然後同阿牧（林遣都）有誤會啦，番到日本公司天翻地覆，部長（吉田鋼太郎）繼續坐陣，多左個擺到明唔知點解鍾意左春田田既小鮮肉新人正義（志尊淳），然後總公司由狸穴（沢村一樹）帶隊要接收天空地產進行收購舊區計劃，而狸穴將阿牧收歸成為精英份子之一加入開發部隊。

好，首先我係電影中心星期六下晝優先場，近爆滿，現場好多女士應該係此劇粉絲，結果全場大笑位真係數得出。我就覺得，呢樣講少少果樣講少少堆砌得幾嚴重。

先講春田田：繼續誇張表情與及今次（好似）有三個人爭，而阿牧又（好似）被狸穴睇中，春田田連戲就係無事業心只係人好呢個性格，所以點解咁多人鍾意，呢方面應該同現實一樣，無得解。就因為其性格，對於阿牧為事業衝刺，甚至搬回老家，不明白，更覺得疏遠與呷無謂的醋。

阿牧其實無乜表現機會，而佢專注事業之時對春田田態度非常飄忽：有時就覺得佢好唔成熟，但見到面又好似乜事都無，煙火會非常甜蜜，但突然反檯分手實在唔多明白，雖然，兩位男主角交足戲，係感動既。

至於部長，比阿牧更無戲演：跟狸穴的事業鬥法流於表面，對春田田因為無啦啦失憶只為劇情有戲可寫，所以，他在這部電影都是無無聊聊，比較不滿是沒有寫清楚佢最後有冇接受武川。

正義的角色是異常奇怪：開到口愛上春田田，在春田田與阿牧分手後明知不能成功求愛反過來鼓勵春田田追回阿牧，然後結尾竟然跟太子女結婚，喂呀，點呀？狸穴反而一直有心惹人誤會，那段約春田田上酒店的幻想戲是春田田的FF，所以最後揭曉已婚有小朋友，還可以（唔代表唔可以溝仔嘛）。

堆砌，果段浴室五人同場猶其明顯，然後加點保育舊物，加點親情（狸穴與爸爸的劇情），然後又回應下其他角色，例如蝶子與歌麻呂結婚啦，千鶴則無乜戲做出下場咁。結尾高潮那段大火戲，阿牧與春田田互相支持，嗯，感唔感動？有Ｄ刻意囉。

睇完，得啖笑咁，又未至於好難睇，但真係好麻麻。咁點解會大收呢可？

套劇就拍續集用上全新故事背景，林遣都唔玩都正確既，咁玩落去，真係好易被定型。