無記當年勁歌一直捧佢成為五強，而佢係寶記日子與及離開寶記真係西歌不少。寶記嘛，一向都如此，音樂工廠一樣無論你唱開乜歌總要有快歌俾你，岩唔岩唱都好都要唱。咁不如俾新一代朋友認識呢位珠寶界富婆當年對香港樂壇貢獻！
打頭陣，我，不得不選呢首：
原來，Cally姐姐第一張大碟已得到一首筍歌！歌名，要爆的細胞，林振強先生歌詞，重點推介為『咬中指』與及『Bloody Mary』，去片：
主打西歌又點止星期六約會呢？當年呢首A Lady of Ice，有冇勾起你童年回憶呢？其實，無線呢個MV，令整件事除左西歌之餘，多左怪談味道：
咪以為慢歌無播！有一首，當年我係聽完唔知佢想點既，叫姐姐哥哥，果位小朋友合唱叫羅堅，後來據知有出唱片又有做電影配樂。呢首歌向雪懷先生既歌詞非常有趣：『漫步像踢波』都唔算係乜，與羅堅對唱呢段先係重點：
羅：雲姐姐你因何要嬲哥哥
鄺：哥哥蝦我
羅：他已多次敲門或者知道錯
鄺：何必呃我
即咁，個人覺得似阿仔唱俾阿媽聽，叫佢唔好嬲男友，成件事咁開心，係咪又要聽下先：
同一張唱片，另一推介叫點俾某君聽，大意係唱俾追求者叫佢死心，我非非非常鍾意呢句歌詞：『企到半夜抵你腳痛』但我又搵唔到邊個填詞播：
最後呢首，收錄係Cally姐寶記最後一張唱片，出左都唔係好多人知既《心動》。入面呢首東方快車，完全同Cally姐姐個形象唔夾，你話甄妮姐姐或者小鳳姐唱，成首歌立即合理晒。好，大家聽埋呢首快車，就好去來一個星期日約會喇！
咦？仲未走？梗係開始愛上Cally姐喇！其實佢有好多慢歌都唔錯，遲下或者介紹，不過若果你想認識佢係其他唱片公司既西歌，好，我寫幾個等你地自己搵：
Fever、單身香水瓶、魔鬼二世、思想撲火
沒有留言:
發佈留言