你諗多左喇

中午，與弟弟吃飯，期間他問：「你面書果堆生日祝福，有一個叫你成家立室，果個結左婚未？」「有拖拍既。」「哦，我仲以為佢好似對你有意思咁添。」「你錯喇。通常對你有興趣既，都會PM你Instead of係公開貼出黎。」弟弟說：「丫，你有你既道理。」

其實，你被人暗戀過未？

首先切勿妄自菲薄地說什麼「我咁既款邊會有人暗戀丫」，傻既，暗戀，靚仔靚女當然機會大，不過同樣眼見有不明所以的被暗戀，而且仲要唔少，原因？總有吸引人的地方，只不過，你不能過電。

我咁既款都遇上被暗戀，至於你問：如何察覺呢？其實這條問題很難答，當你發現某某突然對你生感興趣，而且不停關注你的一舉一動，還借故跟你多接觸，其實，都好明，唔係暗喇。

咁，我呢個題目，又想寫乜呢？

有時，你無意思，但對方以為你有，然後借故俾機會你，遇過未？

我遇過，然後我發現有此情況，立即極度小心，以免被人誤會。之後反省，究竟自己做過乜？

若果你要出外買飯盒，見同事病到死死下，問要不要順道幫你買碗粥，會被視為感動與及特別對你好的話，無話可說。

若果你生日，幾個同事傾開話買生日蛋糕賀你，而我係捧蛋糕出黎果個，你又覺得我特別有意思，我無話可說。

其實當你認為別人諗多左的同時，將心比己：有沒有曾幾何時，因為寂寞，然後對身邊某某的行為無限放大無限聯想然後胡思亂想呢？

因為寂寞，因為無聊，因為太恨戀愛，以致想多了，然後落得尷尬無癮。

我覺得呢，若果有所感應，請先問問自己：對這個人有沒有興趣？若果有，才慢慢去了解是真還是假，總好過活於幻想中，以為這些可以調劑枯燥的生活。

若果肯定自己有心，找出答案又不是什麼問題，我認為，總好過猜來猜去。知道對方沒有興趣，就快快手別想下去。

至於知道別人諗多左的你，麻煩你，盡快讓對方知道收錯訊息，讓人回復正常廣播。