哈！哈哈哈！

是的，當作為一個埃瘋用家，很多app要用錢買而Android不用，的確是有點不爽，不過，既然選擇這部手機就要接受遊戲規則，所以我每次用那八蚊雞買App，都是精打細算。當然，當初開始用，所有朋友第一時間都跟我說：「What's app果八蚊唔慳得，一定要俾。」

當得知以後Android的用家與What's app的免費之約真的緣盡，而且還要每年付八蚊雞之時，第一個反應是：「哈！」當知道每年俾之時，反應是：「哈！哈哈！」當知道有很多人嘈之巴閉大鬧之際，心更涼，覺得那些人嘛，嗯，都是一些較為Cheap精的香港人。

何謂Cheap精呢？即是買部電話五六千蚊面不改容唔新唔追，聽歌就Download得啦有得你八蚊買一隻都話好很貴，食飯唱Ｋ睇戲果Ｄ唔係錢，SMS要錢果陣喪Send個個月找數覺得濕濕碎，有What's app喇，用得爽歪歪，十幾個Group chat不知幾高興，當佢話要收錢，八蚊一年，即刻小人祖宗十八代之流。

無謂說什麼「人地設計個軟件出黎又要Maintain個Server又要不斷Upgrade配合不同System係心血亦都要人力物力要資源架」，因為Cheap精根本不覺得人地用既係心血時間，佢果八蚊一年大過天，就算當年各電訊商推出SMS任Send，月費都唔止八蚊，更何況無得跨網呢？

你用What's app上癮了，有時好似唔識講電話係都要打字Send相Send句說話先安樂，咁，唔好用你就唔會上癮又依賴佢啦，好用的話，要俾錢用，天公地道播！

況且，無人迫你用架，有人話慣性收視死都唔用Line，嗯，當年SMS都係慣性收視架，依家有個免費你唔試唔用對住What's app收你錢就放棄，咁道理好簡單：呢個世界無話邊個無左邊個唔得，即係，What's app唔係必需品囉，心甘命抵同人分手，你無半句怨言我都仲欣賞你。

What's app長期係iTune收費App排行榜穩坐三甲，代表乜？好用而且普及性強囉！

係呀，我都有用Line，當然有其好處，然後有好多人話：都仲有WeChat丫！仲好火紅添，又用電台攪好多合作咁咁咁。用啦，我唔會阻你，我就死都唔用架喇，因為我唔鍾意我寫乜俾人監控，仲要過濾。

咁有人唔高興話：典解iTune用家俾一次錢用一世，Android要俾年費呢？我唔明呢個道理，不過我又同意某些朋友寫：Android用家轉機轉得好爽手架嘛，佢地無乜需要俾錢買App架嘛，咁有錢咪收你錢囉；另一事實就係：你地咁多App都唔駛錢，我又何嘗覺得公平呢，可？

事到如今，我的確繼續心涼，不過最最心涼果批人唔係我：應該係當年iTune突然What's app免費一兩日而又Downloaded既朋友，相信佢地暗暗偷笑：我一毫子都唔駛俾就免費用一世，我咪仲爽歪歪！

哈，哈哈哈哈哈！