就是ABC餐的大太監

我其實真係對無線劇集興趣無乜，去年只係睇過心戰與及4 IN Love。咁，由於係黎耀祥加米雪，我又錄低大太監。假期至今終於睇完，不得不佩服自己好耐性，其實，一邊睇我已經一邊問自己：好唔好放棄？

編劇可能知道觀眾有要求，不過好既編劇可能已經離巢，於是就算係台慶劇，三十多集，只能夠係大框框跟歷史，其餘枝節推進就好似執藥咁，宮廷劇嘛，一定要有呢樣呢樣同果樣，但又由於製作時間所限資源所限，所以，就算演員如何努力，只有出現無戲可演與及為演而演，還未計，有好些演員真的未夠班。

首先聲明：本人對中國歷史認識很差，我看這劇亦不是以此作出發點。首先，如很多好似好受歡迎劇集一樣，硬係要為主角安排一些口頭蟬：李連英不停的講拉拉扯扯得過扯過，彭三順不停的講點解唔可以好好地；這樣都算，最怕就是那些口號：乜乜同心其利斷金，我知！之前紅過『人生有幾多個十年』之類之類，但呢套係清宮劇，你成班太監宮女係度叫口號，想點？

由於角色設定，所以要有個情深的角色。問題係，太監喎，點情深好？於是，安排黃浩然飾演的姚雙喜與陳茵薇的和碩公主有感情線，其實這條感情線的勉強已經別說，公主可以成日跟左太監出街玩夠奇情，無端端整個Titanic式擁抱實在難頂，最最神奇係劇集尾段，可以俾呢位太監私藏公主係御藥房治病而無人理無人管！順道講講：陳茵薇真係唔多適合做古裝，因為佢中文差，唸對白完全唔係果回事；而黃浩然，永遠的苦情樣，夠喇！

另一條感情線就係李連英與宮女倩蓉。兩人演得交足功課，特別是胡定欣，不過有些橋段又係熟口熟面：為左相公而染上毒癮然後連英支持佢戒，果幾場戲，咦？抄義海豪情呀？似到爆播！其實未出宮之前倩蓉之苦命遭遇都算喇，出宮之後除左剛才呢段吸毒事件都還可以，但後來又可以鍾意就俾慈禧召去梳頭，然後又退隱，都幾隨意，慈禧直頭仁慈到爆啦！

慈禧與李連英如何慢慢投緣其實劇集舖排並不交待得清楚，不過當中睇得我最高興既係，慈禧無啦啦有興趣學踩單車，而呢段戲突然慈禧紮腳不見了！當然仲有單車無後座到突然有得俾慈禧坐後面呢件奇事啦！喂！呢段，係咪向金枝慾孽黃德斌揹鄧萃雯係雪地行致敬呀？

奇異事件當然更包括皇上果隻神犬小將軍真係識得走去搵李連英救皇上啦！

至於宮庭鬥爭，由於來來去去都係慈禧鬥慈安，編劇真係無乜心思，永遠就係東太后攪一大場大龍鳳，恭親皇又好唔高興，慈禧最後又攪得掂拆到局，轉頭大家又好似無事發生過咁再好好傾政事；唯一果次，屈慈禧與安德海有路，首先唔明白點解護送可以咁容易俾人捉左公主去（話時話，陳福團隊都幾堅，話捉皇上就捉到，話捉公主又得播，咁典解唔索性殺死慈禧？一次毒唔死咪用第二招囉），然後可以由幾個人講幾句就信以為真，好兒戲囉！

覺唔覺東太后好堅？有胃癌，死極死唔去，一時就氣若游絲，一時就精神爽利去扮慈母，根本就係唔合理地留佢條命搵戲黎做。我唔知歷史係點，但劇集係咪有必要舖排得好少少，唔好俾人覺得佢死極死唔去為左結局呢？

李連英，其實一直被寫成大好人，好人到你唔信，另外就係神人，有乜事搵佢就攪掂，好似睇季節既『媽打』一樣。一次又一次放過凌添壽都算喇，後來仲要幫佢幫到老婆俾人殺死，除左我想話唔合理地戅Ｘ之外都無乜野好講。所以，黎耀祥呢套戲其實無乜戲好演，我亦唔覺得佢有乜突出演出。

最後大結局可算毫無高潮，故意扮有道理講善有善報惡有惡報，就算梁烈唯演呢個勉強合格既同治口水鼻涕都出埋，唔好意思，唔感動，好是但。都仲未講到果位扮極唔似皇后無演技既唐詩詠，最後要同慈禧鬥，唔好講鬥，埋到去米雪果邊氣勢係零，完全唔掂。

無線如果希望繼績拍咁既質素就過到骨，唔該，快快發個新牌，我睇呢兩個電視台唔順眼好耐。