去過未？Ramen Champion

知道日本有幾間屬冠軍級的拉麵館來了香港，落戶佐敦恆豐中心地庫。最近去了兩次，自己試了兩款，朋友也試了兩款，當中有好有差，但整體不錯，我還會再去。

原因是什麼？因為真的有日本拉麵館的感覺，而且管理得不錯，我兩次去也遇見日本顧客，這也證明水準有番咁上下啦。Ramen Champion，你吃過了沒有？

這裡以自助型式，進場時每人獲發一張咭用作點餐，離開時憑咭結賬。要讚的是有人員控制入場人數，所以，你進場會有人幫你找位子。

落完單，你會獲發一個提示器，有得食就會響與閃燈，你就可以去取食物。

茶水部相信因為未獲酒牌所以無啤酒賣，但有免費冷熱水及冷熱綠茶提供。

不如介紹我食過既先啦！第一次，先食無双拉麵，來自東京。

好食！首先，豬骨湯底好濃，充滿碎蒜粒；果隻半熟蛋好掂，三片叉燒半肥瘦又軟滑。我再加上店舖之蒜蓉，食晒連湯都無剩！

於同店點了餃子，的確皮夠薄而餡靚，我與同行朋友們都非常喜歡！

第二次試左來自北海道札幌的毗沙門零，選了函館海鹽雞湯底，麵身比之前食果間粗少少。喜歡呢個清得來鮮既湯底，叉燒係烤過既，仲有至愛既筍，雞蛋不相伯仲，要彈就係塊紫菜已經軟身。

第一次去朋友點了來自東京的“バリ男”，湯底較濃，有大量芽菜，麵身粗，試過少少，我就唔係咁喜歡。

第二次去，呢位好咀刁既朋友第二碗（無錯，係第二碗）點了來自博多一幸社，咁多間係得佢有套餐，但佢呢碗，賣相已經完全唔掂，一試，個湯你俾三十蚊碗佢都嫌多，勁唔掂！

未食過咁既日本炸雞：本身無味，算軟滑，但你唔點鹽係完全唔得，咁收人三十幾，無野下話。

即咁，我係會再去，因為仲有兩間未試，而且以上食過果兩間仲有其他款式。至於果位咀刁既朋友，都唔駛我講，佢彈到一文不值（咁去完日本有比較又好正常既），又話唔就腳，喎。