米線超爛的巴蜀沸騰一片

上星期某晚，跟幾名友好到大酒店聊表心意，看過破地獄後離開，便往紅磡方向搵食醫肚。眼見這間名叫巴蜀沸騰一片的店坐滿了人，我們到達又剛好有人走，於是便決定試這間。

此店主打的是烤魚，即是我去年曾經在北京江邊城外吃過的那些，所以每檯都有一條，不過我們卻對這些有興趣，反而很想試他們的小食與串燒。於是我們很誇張的四條友喪叫小食，然後點了三碗米線。

咁，睇睇我地食左乜野小食：

此蒜泥白肉是抵讚的！白肉中間卷著青瓜，中和肥膩感覺，整體出色。

我話你知呢碟係夫妻肺片，咁呢，味道可以，但肺片唔爽唔薄，麻麻。

酸辣鳳爪，點講呢？太硬喇，味道其實算不錯。

皮蛋尖椒，普普通通，沒有驚喜。

涼伴篙筍，其實整得唔錯，可惜雪過度，咬落唔爽而有點雪得太硬既感覺。

另一推介小食：有青芥味涼伴雲耳，爽口開胃，極讚！

涼伴海蜇，可以的，不過都是雪得有點過籠。

這個口水雞是不合格，水準以下，那個醬可以講係完全唔係果回事，差！

串燒不貴，前者羊肉麻麻，後者豬頸肉就好食。

這個烤青口，失敗之作，醬汁唔知點，青口雪藏貨色，三十八蚊六隻，撞鬼！

米線點差法？湯底無味，係唔知佢叫淡定係點，總之無味；配料有好多芽菜，酸菜無味，米線煮太耐，淋晒，唔掂。朋友果碗用『好ｘ難食』形容牛根丸，我果碗呢？肉碎肥牛，我係成碗食左少少就放棄，真係，差到無朋友。

咁，你若果真係話我知佢烤魚好掂，我無意見因為我無食過，但以上所述並無虛言，多謝！