視帝悍衛comfort zone

黎耀祥接受訪問指批評無線的人好無良心。他指無線仍然為很多人提供免費娛樂，為藝人提供一個大平台出名，仍然有其存在價值。黎耀祥今年五十五歲，十一年前第一次拍劇做男主角然後成為視帝觀眾緣不俗廣告收入因而越來越多，他這十一年應該賺得很不錯。

只是，大家又可能沒有留意：黎耀祥在最紅最多人北上拍劇搵真銀的時候選擇留港，繼續忠心為無線工作。他當年表示不想離開家人太久，而這些年跟他一樣紅或者差他一兩皮的都北上搵唔少，直至最近，他才第一次拍強國劇。

這是一個有趣的職場例子：我因為無線而紅我飲水思源不想北上拍劇，然後繼續當無線的一哥視帝，廣告繼續接，沒有多接拍無線以外的劇集。電影又沒有發圍，一直只能繼續做香港電視藝員。

當然無線的當紅小生可以搵唔少，馬來西亞華人還是忠心的TVBloody，再加上登台之類都有唔少收入。只是，當身處的公司一直走下坡，又有沒有影響自己呢？

當然有：公司形象差，被杯葛，收視大跌，廣告商開始不願落廣告。劇集沒有以往的受歡迎， 你又可以食老本繼續賺廣告收入（因為目標觀眾仲好愛柴九與視帝），又或者繼續食老本的知名度去登台搵銀。唔貪心，肯定唔駛憂柴憂米。

黎耀祥未紅時拍下一大堆爛片，搵食嘛，你估佢想。紅左，反而又唔見佢係電影圈發圍。原因很多，可能電視味太濃，可能當事人唔想離開Comfort Zone——在電影圈，你還是那個拍了很多爛片的黎耀祥，從來大家都知道，電視紅，不代表觀眾肯買票入場睇你拍戲。

所以，黎耀祥繼續留守TVB，就算一代又一代的小生走下一個走下又一個。

跟他同期（或者更舊的）一線仍然留守TVB的，我想起有郭晉安（不過拍劇數目不多）、陳豪（睇怕都好多副業唔憂做）、歐陽波比（咁有米根本唔志在）。當然，每個人的決定也不一樣。

然後似乎看來，黎耀祥已經將自己的興衰與TVB掛勾，於是，發表了護主的言論，一點也不為奇。

他可能真心覺得：TVB對我恩重如山，好多人仲睇緊TVB，我咁努力你地唔欣賞仲要彈，有冇攪錯。

好多人睇緊TVB這回事，其實好多長者都識用手機睇其他野，電視，越來越可有可無。然後，現有的觀眾慢慢老去死去，電視台若果如黎視帝所謂「為現有觀眾繼續服務」的話，咁，等住被淘汰都指日可待。

至於大台提供平台俾藝人，我又同意播：當越來越多人線離開，你唔見近年好多二三線捱左十幾年突然上位咩？都係果句：大家希望囉到知名度，再睇下點做。

於是，當你要留在Comfort Zone然後覺得Comfort Zone is not safe anymore你自然唔多Comfortable。在職場的你和我，太安逸沒有危機意識是很大鑊的，除非你覺得我仲可以賺到最後無謂搏。