高雄親子遊：巨蛋旅店

七月，小朋友放暑假的大日子。我的兩名姪女，非常希望我可以陪佢地一家去旅行，因為，佢地唔想跟團。去年年底第一次到高雄，唔好提發大財之類喇，其實高雄係令我覺得應該再去，好多地方值得我發掘。於是，就同佢地安排並同行一個四日三夜高雄遊。

設計親子遊，一定要有兩手準備，特別是七月乃颱風天。我地出發前天氣預告有颱風會從南到北鏟上台灣，都打定輸數可能有至少一日要係酒店唔出街，不過，又非常好運，個風結果係台灣東邊海域向北走。呢一篇，先介紹酒店，係同學仔一家到高雄住過而推介既巨蛋旅店R14。

巨蛋旅店位於巨蛋站R14，所以交通非常方便，順帶一提，高雄機場有捷運出市區係極之方便價錢跟平時捷運一樣，而且，悠遊卡已經全面可以使用，就算無，你都可以用信用卡搭捷運（不過Visa不能Master可以，而且沒有折扣，所以貴少少）。酒店有四人家庭房，而且非常大間，雖然我發現我竟然無影酒店房既相，但，訂房要注意，Click入網上訂房，要留意有套裝特惠，今次我就幫佢地用左親子住宿優惠專案，兩大張大床可住三到四個人，包早餐，每晚NT$3,800。房間質素與觀景絕無投訴，而且每間房都有一部可以囉出街打到電話（連長途都任打）仲可以有簡單上網功能既電話俾你用，所以，你唔駛用app唔駛無時無刻上網打卡，呢個電話可以方便好多喇！

至於我，一條友住都有優惠方案，有個叫環保方案，住果幾日唔會提供一次性盥洗用具。（潤髮乳、乳液、牙刷、牙膏、刮鬍刀、香皂、浴帽、棉花棒、拖鞋、洗衣袋等），而床單毛巾就唔會同你換（不過我果幾日毛巾浴巾有同我換，唔知點解），每晚NT$3,060，都係非常Good既一人行選擇。

酒店頂樓有健身室，而早餐呢，佢地走環保愛地球路線，係全素既自助早餐（呢樣就唔係好岩我口味喇哈哈），不過細佬一家都食得好開心。

酒店周邊係有好多地方去！我地第一餐，酒店就介紹我地去一家古早味老店三輪懷舊肉燥飯，除左好食抵食，舖頭裝修仲非常好打卡添！

  

古早味肉燥飯，台式便當小食，大人小朋友都食得非常開心，而且裝修係有好多古舊玩具，電影海報等等，我地下晝到店，當然可以任我地拍啦！

另一個酒店附近必到既，就肯定係瑞豐夜市喇！同學仔介紹，佢兩位公子去過第一晚，之後要Encore！我家兩位公主呢，第一次去，可能太攰喇，不過行左好多間，當佢地發現有攤位遊戲（係非常retro果隻，例如彈珠機，又有射擊遊戲，拋圈仔，撈金魚等等），佢地呢d新世代小朋友竟然話要玩！結果玩左兩三樣，贏得小玩具，有得玩有野囉，你話幾高興！

講到食，瑞豐夜市既攤檔真係無得輸！又多，款式又多，價錢又抵，仲要好多間都幾好食！

   

 

  

烤八爪魚腳串，炸雞皮，炸雪糕，牛柳粒，焗薯，米粉炒，烤雞柳，法式薄餅，你只有眼闊肚窄，至開心係住得咁近，買番酒店開餐舒舒服服，得左！

仲有一個小朋友同家長必到既點：台灣有一家叫九乘九文具專家，台北有店，高雄都有！高雄明倫店就係酒店附近，我竟然最後一日先記起，然後帶佢地去，得番四十分鐘，三層，有文具有玩具，大人細路都唔夠時間行，仲要即時入會就有折！

總之各位親子之旅既朋友，去台灣，一定有搵時間去九乘九走番轉，包你買好多野走！

之後再介紹今次帶佢地去過邊度玩啦！