辣得有堅持：四川辣妹子

好抱歉，最近事忙，所以寫得比較少；更抱歉是，有些本地餐廳，明明覺得早就要介紹，明明拍下照片放上online album，偏偏飛完一個地方又一個地方，就忘記了。

於是，近排一口氣吃了兩餐辣的，然後醒起，啊！好幾個月前，去了深水埗的四川辣妹子兩次，辣得很爽，而且很幾得帶我去吃的大佬告訴我，老闆表示唔辣得就唔好黎食，黎得就預左食辣，川菜係咁架嘛！

此店是幾旺場的，而主打除了是雞煲加火鍋及川式烤魚，小食極多，而且極過癮，是具水準又辣又香，淨係食小食都夠開心！

 

此乃惹味炒肥腸，乾辣而香口，肥腸帶點肥又入味，好爽呀！

泡椒鳳爪，堅辣而酸，所用花椒紅椒等等好足料，好食到停唔到口。

 

涼拌萵筍絲當然都係辣既，爽口清甜但又辣；蒜泥白肉無咁辣喇，仲好靚仔添！

 

仲有仲有！海蜇啦！炒土豆絲啦，涼拌豬肚啦，涼拌魚皮啦，仲有炒萵筍片，無一樣唔得播！

 

重慶雞煲，其實再加其他料，基本上煮起已經乜都食得爽歪歪，老細幫你煮到佢收汁，咁就慢慢嘆喇！

究竟果日食左乜野烤魚呢？唔記得，因為我麻麻呢樣，但其他朋友就係咁食係咁食！

 

變身打邊爐，咪講少，個湯真係唔係人咁品，不過越辣越食，叫多幾支啤酒囉，酒類選擇都好多架！

最後要介紹：呢度既重慶酸辣粉好好，我專登點黎食，發覺無點錯！

一大班朋友黎呢度實在好適合，今晚咁凍，真係諗起都想辣番舖呀！