台北四仔旅行團：茂園餐廳

其實是次台北之旅又唔止食咁少餐，不過有部份之前都介紹過，就唔再寫喇，例如馬太郎燒肉啦，京鼎樓咁啦，咁亦都唔係全部食既，我地今次係華山就玩得好開心，去左唔駛錢既高達展啦，仲有要俾錢既光影台北展，仲有Starbucks體驗館等等。

講到食，全程最高潮，肯定係茂園餐廳！都係朋友介紹，話台菜黎講台北一定係呢間，無得輸！咁我地就麻煩酒店幫我地打去訂位，星期一回程前的午餐，就黎左茂園，係高水準到不得了！

未食之前，我想介紹一下檯頭既前菜：

味道都是記憶的一種。餐廳的前菜其中一款係豆醬薑，薑完全唔辣，而且豆醬味剛剛好，非常好吃。我年紀好輕仍然住在黃竹坑時，有時早餐就會配上豆醬薑，或者腐乳。我當時一吃這個，頓時想起祖母，很多回憶湧現，很多，很多。

白斬雞，以放山雞炮製，就算從雪櫃取出端上，雞肉嫩滑雞味香，雞肉與皮之間有一層薄薄的油凍，完全不用加上任何調味料，好吃！同學們一致叫好！

 

此不是湯羹，是茂園必點的白菜鹵！以高湯燴白菜至軟身入味，內裡有蝦乾香菇等等，鮮甜原汁原味，越簡單的菜式煮得好吃越難！

 

這裡的炸花枝丸與海鮮卷是不能不吃的！花枝丸大大粒，是以鮮墨魚打至起膠內裡有墨魚粒；而海鮮卷，有相為證，內裡是鮮魚啊！

朋友介紹必點的：鹵大腸拼豬手！鹵汁好香而且鹵得非常入味，豬手入口即化滿滿的骨膠原，太好食！

 

台灣香腸一定要連同蒜片吃才夠地道過癮！至於炒水蓮，本人至愛，介紹俾同學都讚不絕口！

 

九層塔炒海瓜子，份量十足，材料新鮮，師傅炒得夠鑊氣！至於炸鮮蚵都好食，不過同學們見隔離檯同隔離隔離檯都叫左薑蔥炒鮮蚵，就覺得自己點錯左。

地瓜炒米粉，我點既，介紹同學食，個個食到嘩嘩聲！新竹米粉當然特別好吃，而這裡炒得完全乾身，地瓜清甜，無理由會唔喜歡架！

海苔吻仔魚羹，用上新鮮海苔，清新好喝，完全解除其他食物的油膩感！

黃肉西瓜係飯後果啦！呢餐好滿足，餐牌上仲有好多想食而未食，所以一班人的話，一定要到此店，記得訂檯呀喂！米芝連推介架！