上個月到馬來西亞工作（係，上個月，太忙，好多未寫），當然趁機會見見朋友啦！其中包括一位前老闆，佢早陣子與太太開心快樂移居馬拉，一定要搵佢食飯，而地點當然由佢地定啦！
的確，是次出差食左幾餐中菜都係好值得介紹，其中包括呢間叫魚市場餐廳，個名普通到不得了，地址係呢度：（ 044500, Jalan Kuari, Kampung Cheras Baru, 56100 Kuala Lumpur, Wilayah Persekutuan Kuala Lumpur），果然，無諗過馬拉食海鮮平靚正到咁既地步！
其實三個人真係唔可以食太多，原因係此處碟碟份量有番咁上下，真係不能夠浪費食物！
唔係無野介紹要介紹小菜！小菜當然好香口，我想介紹後面果碟黃辣椒，又酸又辣非常喜歡，我記得香港好似都有得賣！
金沙脆炸白飯魚，即係咸蛋黃啦！唔係講笑，條條都沾滿咸蛋黃，香口又脆身，白飯魚咬落有質感唔係好似食脆漿，呢個好好送飯呀！
吊燒乳鴿，其實我對於燒乳鴿好一般，不過老細話呢度出名當然食啦！咬完一啖我即刻諗起有人話，香港煮中菜叻既師傅移晒民！呢個皮脆肉嫩，而且香口，你完全唔需要再加其他調味料都好好食！
呢個係炒沙白，咁鬼大粒仲要肉嫩又滑，老細揀左用甘香醬去炒，馬拉菜常用，有蝦米蔥蒜辣椒同咖喱葉，又係好好送飯！
印尼咖喱游水活草蝦！份量十足，蝦又大隻又鮮甜彈牙，食極都有，咖喱好香又係好好送飯，香港真係唔多食到呢個水準架！
係咁講送飯，其實當日點左呢個全晚我覺得排第一既：蟹肉炒飯！乜野係堅得既炒飯？粒粒飯粒都咁好味，而且唔油膩，香口程度係你想隊完一碗又一碗，真係好離譜架！
好喇，咁食法幾錢落樓呢？老細就堅持佢請，但我都望過下張單，兩三百港紙左右咋！真係高CP值到不得了！當日星期日晚係爆場既，想食，記得訂位喇！
沒有留言:
發佈留言