三月特別多飯食：蓮香樓

哦？我都唔記得寫到第幾餐，不過呢餐肯定係最大陣仗，因為，認識十幾年既蝗蟲兵團再次出動，地點係老地方：蓮香樓！

一如以往，打定電話去訂位，報名得九個，訂位十個，面書當日臨近開飯突然有幾位茂利報名出現，結果，十四個，差少少要坐埋隔離檯。雖然我地好耐無去，但相信經理都對於呢班友有些少印象，因為呢班人係痴線既！所以特別前來招待。

 

漏講一件事：明明八點開飯，我準時到已經有四五條友坐定，仲要叫左碟野食緊！呢班乜野人黎架！

 

佢地話之前話七點半喎，好彩，呢張相係我搶食完拍低既！海蜇醺蹄！咁，去片啦，逐碟講解一下，好長架播，慢慢睇：

生根鯪魚球，第一食，Surprisingly好食，特別係鯪魚球，我平時好怕腥，呢個，掂！

是日例水：節瓜鱆魚豬踭湯，你睇湯渣既陣容，就知好飲啦！

醬燒骨，又係第一次食，仲安哥叫多碟。似係迷你版醬燒元蹄，好味！

一隻份量西能雞，點形容你知好味呢？生粉不會過多，酸甜開胃，咬落鬆化仲有雞味，可以嘛？

鮮腐竹上湯浸芥菜膽，清清地，菜膽鮮甜！

炸軟殼蟹，唔記得之前有冇食過，但話俾各位去蓮香既朋友，唔好唔叫！真係，唔好唔叫！極高水準！

椒鹽鮮魷例牌，話咁快唔見晒！

呢個係咕嚕肉啦，我地點果陣，經理話：點左醬燒骨得啦，當中果位準爸爸好似聽唔到咁重覆：『咕嚕肉！』兩次之後，我同經理講：『我地兩樣都要架！』點可以唔食呢個架！

金銀蛋浸白菜仔，你都見啦，幾多料！唯一要彈既係，皮蛋煮得唔夠透。

雞蛋焗魚腸，呢碟我絕對唔會試，食果班朋友真得好滋味咁款。

蝦醬蒸肉根，肉根之滑蝦醬之香又係唔可能唔食架播！

加大碼陳皮蒸牛肉餅，本團必食之一，陳皮香牛肉打得極夠鬆化，送飯之選！

蓮蓮蓮藕餅，唔肥膩，啖啖都係蓮藕豬肉馬蹄，一件其實唔夠！

福建炒飯與揚州炒飯，你地有眼見，係咪蓮香出品差極有限先！揚州炒飯真係好好食，夠乾身，師傅唔係Hae做架！

 

個碟無落過檯就每人一隻囉住有女仔拳頭咁大隻既炸蟹鉗，簡直係令到唔黎得既朋友看得牙癢癢！

要預訂的八寶鴨，當晚水準極高，入面所有材料都炆得好夠，所以蓮子極好食，大家當然唔同佢客氣啦！

都一樣要預訂既蓮蓉包，專登整第二張相過你地睇，係，唔恨得咁多！

都係唔訂無得食既蓮蓉焗布甸，果晚既出品，係食咁多次最好食！因為蓮蓉溶晒，滑又香，飽到上心口既都隊左兩碗！

海帶綠豆沙係送既，唔係差架，一樣好清甜潤喉！

其實如果唔係金錢雞賣晒，紅燒元蹄無訂，荷葉飯又未開始有，蝦子柚皮又賣晒的話，邊止咁少！但最驚喜既係，十四位，位位一百六十蚊左右，你話，想點先！