2010年12月10日星期五

2010台北遊之食得好

有朋友問:今次又食左乜好野?我答:今次係我去咁多次台北食得最少。原因?大部份時間被音樂餵飽,又或者,當每日有八個小時於會場,自然無咁多時間去搵食。

不過咁,又唔係無好野介紹過大家既...



飛機餐
咪噓我住!今次如常搭中華,上次食物無好感,今次大進步!

精點所在當然係呢個海鮮撈麵啦!有眼見,料足,味道唔差,有埋紅醋就一絕喇,可惜無!另外果舊朱古力慕絲蛋糕,好好食!


回程呢個晚餐,又好食又飽!呢個肉藻鹵蛋米粉,好掂!另外鳳梨酥雪到凍晒就無乜期望喇!不過唔知係咪因為我無啦啦坐左上Business Class先有咁好食既餐呢?

麻麻地意大利粉

到步後第一餐,由台灣朋友請客,因為佢幫我買飛,我帶左份佢勁喜歡既禮物俾佢。佢原先決定帶我去開餐既地方因為百貨公司周年祭入唔到去,所以去左台北車站附近京站是但食一間,揀左呢個叫Bellini Pasta Pasta,意大利餐廳:


芝士薄牛肉,四十幾蚊港紙,你又期望d乜呢?好勉強囉。


呢個炸魷魚圈就真係把鬼喇!唔係話佢炸得差,而係無乜味,問佢有冇他他醬,佢答你:個脆漿有味架喇!


香蒜蛤蜊意粉,一上檯有d估佢唔到,真係咁多蜆?但都好多殼,更估唔到係,台灣呢味興有湯架咩?整體我都係喜歡我食慣乾身果隻。

酒店早餐之前介紹酒店都略提一二,咁,貼番兩張相出黎咁囉:




喜揚揚灌湯餃
星期日入場前搵食,幾個朋友介紹我去食林東芳牛肉麵,步行二十分鐘搵到,原來星期日唔開,咁有性格。

咁都要食架!附近發現呢間坐左唔少人,叫喜揚揚,賣揚州灌湯餃與及羊肉煨麵,位於八德路二段284號。一條友坐定定,就點以上呢兩樣:



揚州灌湯餃,即叫即蒸八十蚊台幣,未講好唔好食之前睇下下一張相:

皮薄,料足,的確入面有湯又重手,一放入口,嘩!好!好!食!架!入面既湯好鮮架!


呢個羊肉麵,首先呢,個湯好掂,清淡羊肉湯,羊肉好多,仲要好鬆化,帶微羶味,好食到不得了!

我唔係誇張,我埋單果陣真係向老闆講左句:「真的很好吃。」以上兩味共花一百九十元,愛羊既朋友切勿錯過!



指定動作:馬辣
搵到朋友係最後一日Lunch食馬辣,最重要係一定要訂位,同埋唔駛旨意亦千祈唔好訂公館店,西門店呢間不知幾好,坐得舒服好多嘛!


麻辣湯高水準過我上次好多呀!今次終於食到酸菜鍋,原來只係蔬菜精力鍋加一堆酸菜,但好味架播!
唔介紹喇,總之三九九一位呢個價錢呢個質素,你絕對滿意!都未睇甜品呀可?


繼續推介奶酪,無論原味還是百香果味都咁好食;前面呢個係是次新發現,愛玉,好好味!


哈根大師與莫凡比咁多款雪糕,我揀五個球,唔貪心啦可!

台北真係點止咁少野食,下次再食過!

沒有留言:

發佈留言