水準不俗的川菜店《金玥》

登隆街，餐廳一級戰線區，都不記得第一次是什麼原因跟同樣愛辣的朋友走去訂檯食金玥，好像是看了餓底TV報導關於他們的酸菜魚，那次嘛，兩個人竟然點了五個菜（包括二人份酸菜魚），食晒咁滯（酸菜魚剩低部份打包帶走，我之後仲煮左兩次米線食，極歡樂）。

食過翻尋味，最近一次找來一班朋友一起去，一行五人叫到一檯都係，當中有愛辣有不愛辣，都吃得滿意滿足，而且價錢不貴（是的，麻煩用開飯訂，好似有折）。於是，又怎能不介紹一下？

首先一定一定要介紹紅湯酸菜魚：酸菜魚我一定要夠酸（當然唔能夠得個酸字），要平衡得好味，酸辣互相制衡，而且魚要夠滑量要夠多。金玥自家製酸菜，加上蕃茄蓉，整件事又有少少冬蔭功，又加入貴州木姜子油，我可以話你知，你試一吸啖湯你就知道正！

個湯勁開胃，集酸麻辣於一身，魚片唔係得幾塊，而且底下都有好多料，就咁咁大盤話兩人份量（我諗三四個分都可以）$248，你鍾意可以再加其他料例如蒿筍、薯粉、粉絲或者土豆片等等，你試完就會明，點解我食剩一定要打包。

功夫乾鍋大腸，大腸乾身香麻又唔會過熟，配上走過油既薯角，鍾意食大腸既朋友必點！

 

介紹幾個涼拌小食：脆口麻辣魚皮、泡椒脆藕苗、川椒麻辣皮蛋、涼拌麻辣雲耳，記得可以叫佢地辣度上調整，同樣過癮架！

川式腩肉手撕包菜，屬於唔算太辣既選擇，惹味好送飯。

郫縣醬豚肉炒土豆絲，本人心頭好，佢用郫縣豆辦醬炒，加上辣椒乾豬肉絲，炒到乾身，同樣又係會爬多幾碗飯。

有唔辣有唔辣！好似手撕雞、蔥油雞、墨魚餅，仲有唔記得影相既藕餅與及鹽酥脆香菇都好唔錯架！

我就幾鍾意金玥，堅尼地城果間未食過，鍾意食川菜可以Call班朋友去食！