什麼是好電影？不一定要是大製作，不一定要很藝術性，不一定要題材很偏鋒，只要清楚知道自己想拍什麼，有個好劇本，選對了演員，用有限的成本最大的誠意拍一部電影，然後讓很多觀眾有共鳴，就是好電影了。很多朋友告訴我《緣路山旮旯》好睇，於是終於找時間去戲院看了。
好電影還有一個重要元素，就是人坐在戲院你不會看錶而投入電影到結尾。這是一部這樣的電影，而這部電影的好，在於將一個宅男在愛情路上如何認識自己與別人的需要與喜好之餘，將香港的風景香港的日常拍進去——於是，就算電影放在其他地方播放，劇本最基本的劇情，還是可以讓人看得很快樂。
這是關於一個廿八歲只愛Lego的IT宅男阿厚（岑珈其）的故事：生活圈子很細只有兩個最好的朋友，工作與同事相處花了他大部份時間，所以第一個女朋友也是從公司認識，畢業後就一直在同一家公司工作，那個第一個女朋友跟他分手也是不明不白。對的，阿厚對愛情，無認知，無概念。
若果你還抱著：喂佢又宅又細粒又唔靚仔，點解咁得女仔歡心呢？唔合理！你講唔合理，我可以肯定你拍拖經驗都係近零——阿厚平易近人抵得諗少少呆既性格，好多，真係好多女仔好鍾意，阿厚個樣望落平凡但唔乞人憎，特別係有種女仔，想人錫想要安全感想要個男仔好忠心，阿厚呢隻岩晒！仲有，阿厚都有Ｄ錢，事業又唔錯，又有自己地方（後來仲要有車），女仔鍾意佢，合理到不得了。
老老實實，你唔覺街上見到好多靚女，身邊果個都係阿厚Alike架咩？（然後你可能就係果隻無乜拖拍極無知毒舌條女一定貪佢有錢之類的廢廢）。
好，人設如此，然後千祈唔好以為套戲係毫無劇情講佢咁勁溝到五條住係香港山旮旯既女仔，若果係咁我又點會讚套戲！從一開始載佢都有Ｄ喜歡既女同事A.Lee（蘇麗珊）入沙頭角，整段車程都唔識同人傾計，A.Lee一句：「你真係唔知女仔諗乜架播。」道盡當時阿厚既狀態。
剛回復單身既A.Lee對阿厚唔反感但未到愛，阿厚對A.Lee？覺得佢靚囉，鍾意係乜？佢未知。
花花（張紋嘉）近三十歲一身女僕打扮熱衷於當姊妹希望三十歲前生仔，目標明確清楚知道自己做乜，包括住下白泥而元朗返工，佢清楚佢亦好喜歡佢自己、佢既工作、佢住既地方。佢覺得自己清楚自己想點係點要乜，無問題啊！所以，就算阿厚唔鍾意佢，佢完全無Hard feeling，反而令阿厚明白：你知唔知你自己想要乜？
Mena（梁雍婷）係咪真係典型港女？唔係！千祈唔好咁標韱佢！佢只不過係一個有事業好有自己想法既女仔，佢非常有主見，就如佢話：父母以市價一半賣層樓俾佢，佢覺得好合理，因為現實社會係殘酷！無錯，強勢既女仔比較容易喜歡阿厚，而阿厚因為佢靚啦，乜都決定晒啦，佢只要聽聽話話就會係一個好男友。Mena鍾意阿厚，但唔係淨係鍾意佢一個，或者咁講，一個好有規劃既女仔，連一個星期邊日同邊個過可以得到乜，佢都好清楚，但唔好質疑佢對阿厚唔係真心。所以，最後佢主動提出分手，因為佢覺得阿厚唔係佢認識既阿厚，阿厚唔係完全聽晒佢話，佢對於申請大嶼山行車證，猶豫應否答應。
與Mena相戀，令阿厚學識：其實我鍾意點樣既愛情，又係唔係完全配合就代表愛呢？
女神Lisa（陳漢娜）的出現，除左為好多男仔當年都有個女神而寫之外，幫助阿厚明白「以為女神一定要追而其實岩唔岩你」呢個重點之外，其實亦暗暗地側寫以前唔同男仔對於女神既所謂愛：有人吹到自己追過佢，有人靜靜雞溝過仲拍過拖。至於女神，仲要係藝術家既女神，真係唔容易睇上人，佢對阿厚，無愛，只有好奇。
Melanie咩姐（余香凝）其實都係女神，只不過係讀書時期已經經歷一切女神有既光環、被討厭與及被寵愛。曾經當過明星仔，因為家道中落洗盡鉛華當個普通人，咩姐比同年紀既女仔更多一份成熟與世故，佢亦明白，男性動物對於佢，好多都係睇中外表想打場波而不是真愛，所以，佢從大學已經認識阿厚，再遇佢更加明白佢成長左與及原有既優點仍然存在。
在對的時間遇上對的人，阿厚經歷之前不同女性為佢而上的愛情課，開始清楚什麼是愛情與及跟咩姐相處的感覺是什麼，他知道，這是愛，他希望與咩姐一直相處。於是，雙方都有心，只要有人真誠踏出第一步，自然成事。
咩姐是阿厚差不多唯一主動示愛的一個，而那段示愛的劇情，自然有趣好玩浪漫，直率的咩姐令阿厚不再一碌木，亦令他走出那個被他與父親的怨恨困住的家，對的人，就能讓你變得更好。
我實在想不到現今影壇有誰可以演活阿厚這角色，岑珈其是不二之選，雖然整部電影不用太花珈其的演技，但入型入格最沉穩地演阿厚，已經最好最好了。
幾個女角都恰如其份地演好每個角色，當中最有印象的肯定是余香凝與梁雍婷：前者自然地將咩姐這個算是飽歷蒼桑的角色演活了，我一直知道她會演，而這個角色她演得一如以往地好；梁雍婷演的Mena，只要有些毫差池就會變得讓人討厭，她在有限的劇情已經帶了那麼多訊息給觀眾，分手後在車的哭戲，很重要。
兩位好兄弟黃溢濠與柯煒林是不可缺少的，沒有他們，茶果嶺三劍俠就沒戲了，他們跟阿厚的情誼很真實亦很珍貴，我慶幸我也有。
電影選了很多很多本地非大熱歌手作品，選得精準有趣，亦是令電影好看的原因；另外也有個功臣：就是那個外賣仔app的穿插與旁白，還有那些可愛的插畫，都是電影不可或缺的元素。
那麼心急立刻寫這一篇，除因為覺得好值得支持，亦希望電影還未落畫之前，大家可以入戲院支持一下。
愛情小品並不是易拍，拍出這次的水準，很好很好。Melaine這歌，很甜很配合。
沒有留言:
發佈留言