其實諗下自己講乜寫乜出口用下腦係咪真係咁困難呢？正如一班男人圍埋，講女都好常見，對女性身材評頭品足都非常有，當中用詞有幾Offensive唔駛筆墨形容你都想像得到，而開口講果班人可以覺得完全無問題。人品性格絕對有關，有時候唔需要用到好不堪入耳既用詞都可以好好笑好有氣氛，只不過，有ｄ人覺得佢地咁講完全無問題。
最近發生一宗悲劇：一名少女疑似被前男友殺害。傳媒報導貼出女事主放在網上的照片，然後今日我看到一篇ig貼文，將一班網民完全不知所謂的評論貼出，嘩，我可以講，睇到真係火到黎。
首先今時今日，莫講係咪網紅，放自己覺得靚既相上網，同朋友分享又好地球po又好，幾咁平常？我絕對認同，你貼得出黎預左俾人批評，甚至俾人囉黎Ｊ，預左呀，真係預左。當你貼多幾張相，性感少少，你肯定會收到有人傳DM同你講一Ｄ好過份既說話，然後又會有人開始係網上亂噏廿四。
喂，鍾意放著得性感少少既相上網就係一定淫蕩一定有出黎做？你班人渣隨口噏覺得無問題，你 日日Follow日日Ｊ咪算囉，要ＦＦ要乜呢Ｄ係你權利，開口埋口話人出黎做？你覺唔覺得俾你講果個好無辜架？
試下果個係你屋企人丫，你又係咪可以同佢講：邊個叫你貼出黎貼出黎預左俾人講架啦？
哦，點解我覺得靚貼相出黎係有問題？
人渣係唔用腦因為一直都精蟲上腦，依家有人死左，你又唔識佢又唔係有乜證據，就因為你覺得口爽就話人出黎做？又一口咬定一定係佢飛左人派帽先落得呢個下場？
都唔知點形容呢類人渣，點止Blame the victim直頭已經完全超越。呢班人可以將任何女性都用黎侮辱，係任何呀！佢地完全好似reflex action咁，寫呢ｄ不堪入目完全人身攻擊既說話出口成文。
若果同人分手要落得被殺，身邊不知幾多男男女女應該排住隊等死。
有返少少人性唔該諗下：人地死左個女呀，你班人渣口爽爽講個死人壞話，有冇諗過死者屋企人感受？
我好同意果個ig po既人話：呢班losers，連女都埋唔到身，就出口侮辱人。所以，你千祈唔好咒佢身邊果個出事，你咒就咒佢自己出事好喇。
唔該唔好以為網上寫野無責任，香港法例落後咋，好多國家隨口噏係隨時可以俾人拉俾人告架，講啦繼續！
沒有留言:
發佈留言