張天賦與他的《Have a good time》

我相信如何認識一個藝人對於他給予你的印像很有關係：MC張天賦，我第一次聽他唱歌是某一次Chill Club，梁詠琪跟三名男新人合作，而三人當中MC給我最深印像：咦，好唱得，聲音辦識度高。然後去 Youtube聽了反對無效及Good Time等作品，是我喜歡的音樂類型；再在志雲大師的節目看到他的訪問與唱歌，丫，呢個小朋友講野都幾真，講到父母又好真誠，印像唔錯。

之後喜歡佢既音樂，之後買左佢唱片。期間有超市事件，第一個反應係：淨係影到同女仔行超市可以咁大反應？點解架呢？當然接住又有好多二次創作等等，然後見住佢贏新人獎。早排我終於睇晒《造星二》，節目唔好睇賽制對第二屆參賽者極唔公平，至於MC，我終於明白點解有人話睇完造星唔鍾意佢：囂張遲到不停搵藉口無認錯。其實睇到節目後段，佢改進同坦白承認當初睇唔起同一班人合作呢件事，幾好呀，佢認衰播。

講返呢隻首張唱片，好聽，好好聽，係咁Loop左好多次。至於點解我隻碟入面多左張歌詞？唔知呀，我都唔知點解。 

簽約華納第一首單曲Good Time主要是有點輕搖滾，旋律不算十分出色歌詞亦一般，不過MC的唱的確讓歌曲帶來不錯的火花，算是游刃有餘，而且MV拍得不錯，給樂迷有不錯的印像與期待。

我第一次應該係Chill Club聽佢唱，live版比唱片版更精彩，莫講假音好聽，而係佢果種自我享受音樂與及唱出果種groove，非常唔簡單。

第二plug反對無效爆紅，首先有份作曲既Jay Fung真係俾左一首好正既r&b MC，而波多野裕介編曲好得，陳詠謙填詞有Punchline（唔係邊有得之後係咁囉「外間很多反對我愛你的聲音」黎玩呀），舒文監製，呢個製作組合好強，而MC實在唱得好唔錯，首歌非常入腦，點會唔紅呢？

唱片有收錄英文版How Many Times，而我更喜歡佢同Jay Fung合唱版本：不過真係一比較之下，Jay Fung真係掌握得更好，呢類歌曲你要把聲好放鬆，呢方面MC可以再努力一下。

其實我非常喜歡Loser，覺得係呢張碟最高水準作品。陳考威加JNYBeatz曲與編真係好feel到一個點，而T-Rexx歌詞加陳考威rap歌詞將情場loser都型到一個點，呢首r&b加lofi夠groovy，而MC唱得比反對無效更高水準，而整段英文Rap掌握得好好，加埋呢個茶餐廳MV，呢首歌係被忽略！

徐浩加林寶記憶棉，一聽就知呢首肯定大熱。慘情歌市場大，而且仲要有難度，基本上大把人愛唱愛聽。我都曾經提過，以新人水平，呢首歌佢已經唱得好唔錯，但我相信再過多幾年佢情感練歷更多，佢肯定會唱得更加夭心夭肺。

出碟之後先派台既時候不早，係MC與T-ma及GooChan作曲，鄭敏填詞T-ma填Rap。呢首Acoustic R&B屬於全碟最舒服作品，冬天帶來一種回憶的溫暖與遺憾美，同樣屬於好高分作品。

今時今日歌手藝人已經同以前好唔同，做自己會改進會堅持好重要，MC有果種坦率，唔會Sell乖仔，有人可能覺得佢係壞孩子，但我諗，以佢講及自己如何練好唱好歌，從busking唱到出唱片成為新人金獎，佢對音樂堅持與努力再加上天份，香港樂壇絕對不容忽視呢位張天賦。

呢排喪落雨，大家小心地滑。