2020年我聽得最多的本地女歌手第二位肯定是AGA（第一位無法子，一定係都入左叱吒我最喜愛五強仲未出碟果位＃條女咩事），原本今年開演唱會，開唔成，唔緊要，呢張《So Called Love Songs》的確好聽，好聽到可以不停Loop住，快歌慢歌皆精彩，而AGA應該搵到自己寫歌方程式，知道邊一類市場一定得，同時亦會試其他類型。
路遙知馬力，或者應該咁講：當同唱片公司另一位被唱片公司不斷叫佢唱悶歌越唱越死，AGA貴精不貴多，慢慢派台，首首精品再出碟，實賣得架！
首首歌都英文歌名，第一首Tonight，第一次睇MV，駛唔駛咁靚咁浪漫！歐洲取景外籍男模慢節奏拍攝，與歌曲非常配合！Love Ballad目標觀眾應該係一眾要結婚既朋友，呢首，放婚禮用，肯定配合！當然一定要讚Johnny Yim編曲，盪氣迴腸，而林若寧份詞可以啦，雖然我唔明白乜野係「這一晚十分短暫年月遠」。
然後有愛情小品Two at a time，講述男友一腳踏兩船，但又唔係賣苦情，將無奈輕鬆化，或者當事人唔願清醒好享受。R&B曲風架輕就熟，而且非常易入腦，加上一個復古得來有趣又靚既MV，過百萬點擊，應該唔係買番黎。Everyday是R&B加少許電子的作品，找來外國樂手編曲，豐富精彩，比起上一首我更愛呢首！放不低前度每日陰魂不息，環球好有心機幫佢拍MV，呢一首走懸疑路線亦好好睇！
我最最最鍾意應該係MAD！復古電子風，首先要讚T-Ma編曲，將呢首與愛侶亡命逃走非常有電影感既一首歌配合得非常好！而其實一直好喜歡AGA唱快歌，之前小問題好喜歡，所以，堅想睇佢演唱會，特別見佢最近既Live水準好唔錯，快歌？當然更期待啦！同碟再次搵Ghost Style為MAD做Remix，整首歌氛圍又不一樣，高質素，無理由唔推介：See You Next Time應該係全碟比較傷感情歌，不過並非單純苦情歌，而是學習放下愛不下去的那一位，好聚好散，See you next time！這首歌是越聽越有感覺，特別當你經歷過。找來麥子樂與蔡思韵拍的MV，為歌曲加分！「朋友慢走，下次是哪雙手，甜蜜地跟你走」、「仍信愛過的好人能活得到更好」。Acoustic version亦好有意思，淡淡然放下了，心境更平靜，成長了。最後派台的點題作So called love song，繼續R&B，節奏上不一樣，歌詞比較密，寫的是被操控的愛情，表面看來是首甜蜜情歌，但心知肚明。相比碟內其他新歌，這首放最後才派台是明智的，不是不好聽，是較像Side track。
唱片還收錄了好耐好耐之前寫俾洪卓立然後張敬軒再改既空手而來 Demo，與及Wonderful U Demo，咁就十首歌。嗯，都係果句啦，依家要出十首歌新碟，談何容易？
等住佢上紅館，等住佢做更多快歌，水準保持得咁好，點可以唔支持呀！
沒有留言:
發佈留言