一起吃飯嗎？

好耐無寫有關職場的事。當大家被迫或者被安排在家工作好一段時間，終於慢慢回到辦公室，覺得還是回去上班最好因為在家工作是自動OT搵笨實的，然後，同事之間有一種久別重逢之感。有些朋友，時常跟同一批同事食飯，一個星期無四五日都肯定有三日。

其實，你喜歡與同事食晏嗎？

加入一間公司，通常都會一齊食飯歡迎你，然後，上司會交帶一位同事照顧你。通常上司所選都應該或者可能唔會係衰人（咁當然有衰人啦，即係上司唔係有心整你而係上司是但搵而被選之同事又唔多高興），所以點都會問問你：有冇約人食飯？一齊食丫！

作為公司新丁，與同事食飯或者找到適當的飯腳是很重要的，因為同事一定可以有資料幫助你快速認識公司，又或者，知道地雷所在。所以，除非你身居要職，否則剛剛加入一家公司，有同事約你食飯，最好都去，最好能夠與不同部門同事都食一食，收風會更不一樣。

有一類人，總喜歡覺得，一班同事（可能四五個啦）應該常常一齊食飯。他們可能當你係「一家人」又或者「同黨」，午飯時間除左講電視劇講娛樂版講買菜煮飯就是講是非，由於「講是非」的原故，所以，你若果唔去一次、兩次，佢地就慢慢幫你退會，以後唔預你。

以上情況還有另一種可能性：公司部門人不多，阿姐又好鍾意有人陪食飯。於是有一兩個一向好識做，你剛剛加入，你又可以唔跟住嗎？

至於我呢？我出來工作多年，除了一些聚餐之外，與同事吃飯絕對不會是指定動作，想跟誰吃飯就約，有時心血來潮會問相熟同事要不要一起吃飯，同樣也有人會找我吃飯，若果不忙又沒什麼事，就一起吃，很簡單。

我從來不覺得，一個人食飯有乜問題。所以，我絕對不會刻意搵人食晏，或者迫同事一齊食晏。

至於以上提到果種一個星期三四日都聯群結黨開飯去，我是非常抗拒：喂呀，就算大家好好感情，工作時日對夜對，食晏可以有少少私人時間抖抖氣嗎？仲要對住？

最慘係乜？就係呢班當你係自己人既同事，餐餐都食得勁貴，你唔跟又驚得罪人。我就好有性格，中過招，真係會Say No。

若果，你身處果種「唔一齊食飯怕得罪人」的格局，咁睇啦，公司唔大兜口兜面都係果班人，而大部份都一齊食你又怕俾人話你離群，的確有少少難攪。我會建議你慢慢淡出，一個星期Join番一兩日，其餘時間自己處理，囉番個平衡會比較好。若果其實你真係想食晏時自己靜一靜睇下劇上網唔想參與三八時間，你可以選擇玩帶飯，除非，你公司有指定地方食飯，又有一班人一齊帶飯一齊食，咁無計喇。

無論如何，與同事保持適當良好關係是重要的，畢竟，你無可能收晒所有風，無人關照，好蝕底的。