其實再次寫扒房都有壓力，不過咁，我都係用我自己口味黎寫，大家覺得岩睇咪去囉。呢間叫Neil's Tarven其實由1969年係曼谷開業，現時曼谷有兩間舖頭。當地同事非常愛吃牛，就介紹呢間俾我喇。
我當晚係光顧位於Soi Ruam Rudee老店，已訂檯，店舖好有卡士，隱藏民居當中，而且據聞為左食客可以專心食，店舖無提供Wifi。
裝修都係傳統老式扒房格局，特別既地方係竟然有兩三個提供俾我呢類孤獨的美食家既單人卡位！事不疑遲入正題喇。
影得唔係太靚，呢個係匈牙利Goulash牛肉湯！此湯以牛腿肉及蔬菜薯仔紅椒粉炮製而成，呷一啖，牛肉味香濃，而且蔬菜鮮甜味道全變成湯既精華！蔬菜好多，而且係經過長時間烹調，每一啖都好滿足。
麵包需要另點，因為此店有Bakery，據知都非常有名，五月起Bakery改成晚上七點關門。麵包有幾款選擇，我選左呢款輪包，香既鬆軟，呢40baht俾得好值！
主菜係另送沙律及薯菜！沙律可以揀醬汁，蔬菜新鮮絕不馬虎，而薯菜係一整個焗薯配酸忌廉加上炒雜菜，份量十足味道亦好好。
另外點左Side Dish：芝士焗菠菜，無得輸架播，芝士香濃上檯熱辣辣食果陣仲有芝士絲拉出而菠菜仲濕潤咁囉。
鵝肝牛柳，五成熟，紅酒汁。牛柳有200g重。一上檯我已經嘩左出黎，因為真係好香好香。
牛柳真係煮得好好，本身牛柳靚啦當然，咁你見到入面真係呈粉紅色。
本身係應該咁食因為鵝肝太太太肥美喇喂！個汁加埋肉汁又係不得了。
其實食完以上都滿足到不得了，但眼見有客人食甜品，其中有一位仲要威水到有侍應親自成架車推黎整杯著火既Irish Coffee俾佢（而呢位阿太俾左都幾多錢Tips），雖然我對Irish Coffee無興趣，但都點左個甜品：
泰式椰子雪糕，你可以見到有好多配料：栗米，大樹菠蘿，糯米，榛子，椰青肉，蓮蓉等等，我其實落完order，個經理過黎話：「You've made the best choice」，的而且確，清甜好味，所有配料我都食晒。
喂以上咁食法，港紙五百幾。我就唔知香港要食番呢個質素駛唔駛近千，但呢餐實在非常驚艷，我諗下次去曼谷唔係出差我都會俾自己豪一次。
沒有留言:
發佈留言