我在吉隆坡開飯（三）

唔駛自己俾錢自然可以食好少少，仲要呢度食好少少個價應該係香港食好多多個價，所以，四圍問，上網搵，應該唔會中伏，卦。

今次到達呢個好靚既商場叫Pavillion，決定食好野，揀一間有水準既意大利餐廳叫Michelango。一去到，裝修與及氛圍應該都對辦，好似突然間我著短褲出現唔係好夾咁。

我就由頭盤湯主菜甜品咁叫，咁佢又好細心問：你想上湯定頭盤先？頭盤啦，因為係我至愛，Carpaccio。

食呢道菜，最驚就係牛肉有雪味，呢個無；另外，用上好唔錯既欖油，所以將火箭菜與牛肉片放入口，好開心，好新鮮。

丫我仲有點左呢杯果茶，好飲，好似無酒精既Sangria，而且水果好新鮮。

Minestrone，好家庭式既感覺，好多蔬菜與豆，無過份調味，個湯好好飲，其實食完，幾飽。

主菜，我點左Filetto Costola con Funghi：係乜呢？安格斯肉眼扒配藍芝士汁。我點菜說明Medium Rare。上菜，係咁：

作為食肉獸多年，一眼就覺得肯定唔係Medium Rare，一切開，應該接近Well Done。立即叫侍應，解釋佢知呢個肯定唔係Medium Rare。然後佢道歉再Serve俾我：

非常中肯既意見係：所有配菜好食，個牛其實幾靚，不過唔知佢係咪再整，咁入面好嫩既，但凍左少少咁。即係努力Grill個面然後快快手上菜俾我。個blue cheese sauce係無得頂既。

呢個唔駛介紹，好正宗好好食，酒香與咖啡香好平衡，每一啖放入口都好滿足。

以上咁多道菜，兌番港紙，四百有找。我覺得除左個主菜有少少失望，其餘都好好，應該或者食Pasta會好d，因為見隔離檯個Pasta，好好味。