100毛系列：香港仔之勝者為蝗

上期（文盲黃偉文）做封面既100毛好睇，好睇在於除左有Wyman講文盲事件之外，建議大家得閒無事去sit堂之外，我最愛自嘲系列：『香港仔之勝者為蝗』，講乜呢？就係當香港人不停定性某類人為蝗蟲，其實自己都有好多衰格到不能之行為。

係，嘲笑人容易，認衰極之難！之不過此環節提及的幾種行為，又實在於我地日常生活中久不久就出現。

第一項：戀愛真人騷－－即情到濃時的情侶無論在任何公眾場合都可以肆無忌憚地親熱。個人對此其實接受程度都不低，不過，當中提及最最最礙眼，莫過於在宜家出現的。

係，我都有睇過心跳500天，又或者，我都有與情人於宜家閒逛經驗。雖則未去到電影玩到咁Fun，但我絕對明白，兩個人你一言我一語「幻想」以後的家要怎樣，好正常的。不過我最最頂唔順，就係真係霸佔梳化兩條友唔知做乜。雖然我未見過有人係宜家過份親熱到要家長指責，但，坐係梳化各自玩電話當自己屋企呢下已經討厭！我最近睇梳化，想研究某張梳化並拿取單張，有一對情侶好似俾人整古痴實唔識郁，我當然無理會，照近距離摸張梳化試彈性，先有人識趣彈開少少。

第二項是我覺得最乞人憎：睇圖！

即咁，由以往既老麥，到大家樂，大快活，美心，到Starbucks，都真係有人好厚顏無恥地霸住張檯／個位放住一杯相信應該得番些少既咖啡堅稱自己有幫趁。我曾經見過最過份，係幾位哥哥仔係快餐店一人一部遊戲機對打，另外就係又係幾位哥哥仔Card聚！以上同樣出現於食飯黃金時間，呢批新一代係可以局部眼盲，完全無視一眾捧住餐盤希望快快手食完個飯上寫字樓眠一眠既工友們。

其實我好想知，此類連鎖店，有冇相關策略『請』呢類人於繁忙時間過主架呢？

第三項：睇戲的劣行，早前已經寫過一篇，佢提及果幾樣（包括被後面觀眾踢椅背、遲入場阻住人睇戲，睇戲途中手電Mon發熱發亮與及高聲談論劇情）我雖然無提，但絕對同意是非常老土的行為。

第四項：大聲講電話，特別於公交上，此類人完全無視別人唔想知你同條女嘈乜／你老細有幾賤／陳師奶打牌幾無牌品之類之類。主題曲，呢首：

最後幾項：成個背脊得住條柱／上巴士死人都唔肯行入車廂阻住晒／落雨開遮隊人眼，大家都好有同感，是嗎？其中我好愛呢一段：

『一班自以為有趣的小學雞，開遮放在地上轉，彷彿以為那把遮是個爆旋陀螺，看見水花四濺便發出May姐式煩膠笑聲，認真係打你就應該，唔打你就悲哀！』

好，今集係咁先！順帶一提：我去澳洲帶住本永城弟弟做封面既100毛，成程機好歡樂，然後該本雜誌放在弟弟家中，他們兩夫婦都非常喜歡，弟弟仲叫我盡量Keep幾期俾佢睇添！