澳航初體驗

大家好，多得呢隻賤兔，我遲左成日先番到。我知呢幾日都無寫，原因除左玩得開心，仲因為我唔係好慣用Notebook寫Blog。由於明早終於要回公司再戰，今晚，想到寫一篇簡單的。

這次因為早早經澳航買機票，比較便宜，對於這航空公司，基本上是要俾個讚佢，不過，當然有不足之處啦！

未講航空公司之前，要講講澳洲出入境：麻煩，入境就算過左香港海關，上機前仲要Check你手提行李，所以，有部份搏老命一喼二喼既太太們怨聲載道；至於回程，如常Check完，以為走得，點知佢地會Sampling拉人埋一邊又唔知用乜鬼儀器再掃個袋一次，咁，之前Check果部又用黎做乜？

好，來回都坐A380，座位尚算寬倘，而Qantas既娛樂系統係好豐富，當然，若果你飛澳洲都堅持要睇獎門人的話，佢地無既。港產片，佢都無既。不過電影呢方面真係多到爆，仲要夠新。Before Midnight有，Fast & Furious 6都有，最鍾意佢Oscar果個Categories，真係差唔多大部份贏大獎既片都有。

最重要當然係食啦！話說我出發係夜機朝早到，不如睇下晚餐先：

雖然我發夢叫錯呢個酸甜雞柳，但，好食喎，我要讚就係個沙律與及果個甜品。

至於飲品，選擇的確好多而且寫得好清楚（其實飛機上好多都有得飲，問題係你知唔知與及會唔會叫黎飲），不過特別推介就係，通常飯後機艙服務員會走過黎問你飲唔飲Coffee or Tea，佢地多一樣，就係澳洲吉百利既熱朱古力！

呢個真係好掂，每一杯仲放一粒綿花糖，肥？梗架啦，但好飲丫嘛，所以回程都飲多杯。

早餐，有圖有真相，的確無得頂，夠豐富又夠營養仲要好味，份量十足，怕你落機會野落肚，呢個早餐好好好！

回程呢，係早機喎，呢個Lunch Set，點睇先？

先介紹左上角：係一片好厚既芝士配兩塊餅乾，好味又懷舊；主菜係異國風情米飯，鷹咀豆及雞柳，好食，但唔夠飽，唔緊要播：

可能因為凍，呢個杯麵好溫暖，慢慢亦見其他乘客都叫。佢仲有成個蘋果派俾你食喎，臨落機前個半鐘果個下午茶Set唔記得影，但有一個熱辣辣既芝士薯仔Rosemary批，都幾好食。

食之外呢，佢地容許乘客將唔大袋既手提行李放係前座底，呢個好方便，好過堅持要你放上行李櫃；另外，唔知係咪我遇到既機師問題，來回兩程飛機都比預定時間為早，例如今日飛番香港，降落時間比原定早左三十分鐘。

咁，有乜唔好呢？例如今次飛機delay，竟然無用Email通知乘客！咁我當然一直有Check所以知道，但亦因此，我有親友昨日未收到佢地電郵，當中應該附上信件，可以在額外多一晚住宿時有A$50補貼。當然，向航空公司反映此事，佢地都話會再處理，但似乎呢方面就對乘客唔多小心。

嗯，仲有一點：此航空公司之機艙服務員相信無年齡限制，所以，外貌協會之朋友，相信應該好失望。當然，我亦可以對於佢太太太過小心而決定delay一日，但，再重申一次，呢個風，攪唔到香港係香港好彩，而唔係佢廢。