我是你的誰

從這個地盤開始，到在面書開多個地盤，不知不覺好一段時間，然後唔清唔楚有一班Followers。近來的確無咁多時間寫blog，但面書都仲可以處理，有時同大家分享不同事情，幾高興的。

不過似乎有人唔記得幾件好重要既事：呢個係個人部落格，面書亦然，而重點係：我真係一個人，而唔係一個團隊經營；無廣告，無贊助，亦都無收你地錢。

一個個人部落格，並不是一個資訊Portal site，不是一個傳媒。即使如此，我都盡量確保所寫所講都有根有據，有錯就盡快澄清。

所以，上網既你同我，從來都唔好開口埋口問人攞答案，你應該自己搵答案，我無責任俾答案你，無責任解俾你聽。

我係一個人，我有朋友有工開有家人，我可以對人好客氣，因為工作上或者現實生活上，無必要無緣無故得罪人。

當然，我在網絡世界亦唔想無緣無故得罪人。但正如我一直強調，我係一個人，部落格或者面書所講所寫，當然有我喜好，亦有我立場。

好多野都可以討論，但若果我覺得你根本係黎攪事，咁好簡單，我會送客。因為我唔喜歡有人攪亂我個場，我睇唔順眼。

係，個場係Open to Public，但唔代表我唔可以定我既規矩。我無收過你地錢，你地唔follow我亦唔會少左忽肉，我都係繼續咁寫。

我唔係要營造一個專業大好人形象，所以，真係真係真係，唔好勉強，唔順眼，覺得我呢樣唔好果樣唔妥，千祈千祈唔好繼續睇落去。

我就係覺得生活係呢個社會已經好多野唔多順眼好谷氣不過無得改變，咁，我有自己地盤，見到污糟野，快快手清除，好正常。

我係自己地盤應該做返自己，而最起碼，我都要開心先可以繼續有呢個地盤。

放心，我仲幾開心，對於果Ｄ烏蠅都係會快手處理。寫呢一篇既目的，只係希望有人明白，我無欠你，亦唔好同我講服務態度。