又豪又好食：後街牛扒

重申一次：顏色重要，食物質素更重要。早前跟朋友去灣仔後街牛扒，佢就話有人話佢知好好食，我就食過一次晏，好食，不過果次職員鬧晒交就唔係好好Feel。今次，係要訂檯，因為原來晚市非常之爆。

晚市Menu並唔算平，我亦可以話你地知，我地食到成千蚊一位，不過咪嘩住，睇下我地食左乜先。

我地又點主菜又點前菜又點沙律又點甜品咁樣樣，點過之後，首先出現係兩杯餐前酒，免費：

澳洲2016年Sauvignon，易入喉又清甜，未完播，仲有：

這也是免費，Chef Starter，老人家記性唔好，淨係記得果個係牛仔肉酥皮盒，侍應亦話我地知應該食邊個先，唔好講佢免唔免費，呢兩件，好有水準。

Green Salad同Spanish Bread都係點主菜都有，沙律係Ceasar，清爽，而麵包熱辣辣亦香噴噴，咁加埋以下呢個無得輸既蘑菇湯，實在已經對呢餐有期望喇！

咁旁邊呢個又係乜？人人有份，Chef tasting appetizer，應該係從右食起：無記錯好似牛骨髓，中間就和牛配魚籽醬，最後就最濃味既牛肉丸，係呀，咁食法，都未到主菜。

我地係加左一個cold dish兩個appetizers：Napoli Beef Carpaccio，比起平常意大利beef Carpaccio好食，佢係配上蕃茄粒、橄欖、熟蒜，火箭菜與及油醋汁，當然，牛肉質素高亦非常重要；旁邊呢個係法國有機鵝肝，合格有餘；然後呢個比較值錢：挪威深海野生Scampi刺身，係好好食呀，不過咁樣一隻就要HK$160。

主菜，我點美國Brandt Beef Prime Holstein牛腰扒，三成熟。香港食到呢個質素，HK$460，係好值（呢個價錢包左前面好多野），只係輕輕加上Mustard，蒜粒與海鹽，已經唔知好食到去左邊，的確係肉味油香濃厚；朋友選果個係美國1855 Oyster Blade，都係三成熟，呢款就稀少部位，牛味無咁濃帶甜，我地就鍾意第一款多少少。

甜品係要另點：Tiramisu各樣味道平衡得非常好，唔係太濕潤；至於意大利雪糕配黑醋，原來咁好食真係估你唔到！

今餐食得非常高興，好味又飽肚，絕對係會再去食過。