究竟《男排女將》我覺得有幾好睇？我都曾經係面書發表過：我係遲人好多先開始睇，身邊朋友呀網上呀不斷喪見大家極推乖乖番屋企睇電視（再直落睇埋造星３），於是，我應該係12月16日開始睇，即係，離大結局仲有兩日，然後痴線到，12月19日半夜三更，睇晒。
ViuTV2020年自製劇非常精彩，《歎息橋》我亦是極速睇完，最近又係極速睇完《暖男爸爸》（放心，點會唔寫），我無寫既《二月廿九》其實亦非常精緻（只係少少爛尾），而《男排女將》之所以好睇，係，我鍾意睇排球，但其實本地劇集寫體育出事率極高，通常都係兩個可能：變左卡通化超能力，或者是是但但體育成配菜實質主菜係四五角戀，《男排女將》二十集以甲一球隊力臻因為球員較矮小，由葉鳳儀這名女教練執教從丙組打到甲一的故事改編而成，找來極度合適的演員，就算成本有限都認真地拍出一套以排球為主軸的劇集，盡量貼地而且不會一味唱好，劇情起伏大都有節有理，這就是一部成功吸引香港人乖乖地趕回家追劇的電視劇。
很很很欣賞的劇情其中一定是家瑜如何引導一直深信自己是大鎚手的阿King改打自由人，阿King的拚命與熱血是隊中之冠，排球魂最強，要一個一直以得分為目標的球員改打無得進攻的自由人，談何容易？但劇集就寫得很好，家瑜如何一步步引導這個愛排球愛球隊的男生明白將自己發揮無限大的重要性；第二段肯定是當球隊升班後，為了Bobby的發展而讓他到甲一跟操，再讓其他球員與及家瑜自己使Bobby回想為了什麼要打排球，最後真的決定轉會；當然一定不少得魚仔因為與阿King爭波而受傷，以為從此不能再打波，後來被啟發原來自己一直是左撇子用右手打波，右手受傷就改練慣用的左手再出發，很勵志，同時也鼓勵家瑜再次面對排球。
還有因為阿King與魚仔因為爭功而差點大打出手，家瑜就算球隊面臨出局也要懲罰兩人不准落場直到兩人明白團隊合作的重要性，也是很好看的。我也不會忘記他們被一班阿叔打敗，在街場被挑機，還有最後如何成功打到最後一分擊敗翔鷹——當年因為他們矮而放棄他們的球隊，熱血精彩，知道演員們好些都沒有排球經驗，只是拍劇前努力學習，打得似模似樣，互相補位頂硬上，都是讓觀眾非常難忘。
以為成了甲一冠軍劇集就完，怎知劇集還要寫下殘酷的現實：因為大家畢業了，有的進了港隊有的要搵食，越來越少練波，球隊面臨解散，家瑜的心有多痛，但也明白現實是這樣。你有沒有被家瑜電視訪問給十年後的力圖那段說話感動到呢？
這個契機同時讓家瑜決心到泰國打職業賽，因為力圖，令他重拾對排球的那團火，衝破受傷後不能跳的心理陰影，就決心再次去追夢。
大結局也是精彩到最後一秒，劇集大奸角當年對家瑜恨之入骨的魯Sir出手令力圖不能打會長盃，而因為這個比賽，四散的隊員重新練波就是為了為家瑜再次戰一次，結果其餘幾隊的星級球員拉隊離場，走到廢校球場另打會長盃，啊，那麼有意思啊！完全是由頭精彩到尾的一部劇集！
要讚的還有劇集將愛情線點到即止地成為剛剛好的甜品：魚仔與安安的歡喜冤家到愛上有青春劇的低能但甜到漏（係呀係呀Ian隻歌我立即愛上），家瑜與男友分手寫得很寫實而痛心，而千年忠心兵黃金Sir那句友誼永固相信唔少人同我一樣睇到爆晒粗，最後才與家瑜相戀也總算大團圓。
太厲害，演員演得好，令劇集好看到不得了。Stephy是劇組不二之選，他的球員背境肯定被這劇本吸引，而他演得不慍不火，熱血而投入，由頭好睇到尾。顧定軒拍出了代表作，無論是開頭的固定嬲到後來的固定喊，King這個角色是非常令人印像深刻的。幾個Mirror與Error仔仔，很成功了，令我這個原來對他們真的無乜認識而後來走去搵佢地歌黎聽，ViuTV谷旗下藝人，有心有力有技巧而不是硬銷！一定要提肯定是黃金Sir的陳宇琛——我諗，佢拍左咁多年戲，呢套肯定係人生代表作。
劇集出現三首歌，我就唔會貼Stephy果首「碰喇喂」架喇，我知，你地好鍾意神隊友，我又好鍾意正式開始，貼晒好無？
沒有留言:
發佈留言