Kiki麵吧幾好食

都唔記得從幾時開始認識Kiki拌麵，之後我試過老媽拌麵，試過曾拌麵，試過賈以食日，麻辣黎講我都係最愛Kiki，份量非常吊癮：又唔可以話唔飽，但食完又好想再食。知道Kiki麵吧在香港落戶，我在台灣都未食過，香港，終於去年十月底食過一次。

當日去K11 Musea睇親愛的房客，遇到親愛的醫生師弟，然後一齊打完Pokemon之後就決定食Kiki麵館。我係喜歡既！

當晚有一個HK$148套餐：有一小食，一主食，一飲品。睇睇我地食乜：

小食有幾款選擇：包括台灣香腸、皮蛋豆腐、麻辣鴨血、醬煮大根、胡麻秋葵與及我選既涼拌燻蹄雲耳。雲耳好食，因為又爽又帶酸辣，燻蹄則一般。

麵食有十款，我真係諗都唔諗就選呢個：蟹黃油拌麵！首先，麵係爽身彈牙，一食就知道真係Kiki麵，你想辣咩？平時跟麵果隻椒麻粉任你落！蟹油蟹黃，你唔好期望係超級質素，但呢個價錢，量足而且夠料，再加埋醋撈黎食，真係無得頂架！

飲品有冬瓜茶或者白桃烏龍，我揀凍白桃烏龍，清甜有茶味！

我地另外點左：椒麻雞，一般啦，雞排尚算嫩滑，不過咁賣相就有少少求其；蒜片台式腸，預期之中的味道，想念台灣。

呢個係師弟好想試既櫻花蝦蟹粉撈腸粉，嗯，並不推介，腸粉有點硬身，唔知係咪叮過。

後面果件伯爵茶戚風蛋糕配黑糖珍珠係一定要食！一定要食！一定要食！清甜，伯爵茶味香濃，蛋糕綿密鬆化，不得了！前面呢個仙草珍珠，你俾我再寫啦：好掛住台灣呀！

總體來說，此店係唔錯既，坐得一般舒服啦，價錢又唔算過份。