中環至愛居酒屋：魚治

當我還是中環人的日子，有一次被同事帶來位於M88七樓的魚治。又有咁岩第一次去之前睇左本過期雜誌介紹，此店乃東京著名居酒屋主打爐端燒，在香港開設第一間海外分店。

午市吃過晚市也吃過，午市是家庭式勁大件夾抵食的套餐，晚市有好多好多好多好多款清酒仲有好多小食供應。我以為我一直有介紹過，原來未，咁今晚回味一下，再約朋友去聚聚。

午市餐牌如下：

我就一定會問問店員今日日替定食係乜，HK$168，每次去都有少少唔同。

第一次食到呢個薑汁豚肉定食，你見到喇，陣容之鼎盛真係唔講得笑，除左主食加一大碗飯，仲有唔係hea全既味噌湯，釀明太子魚餅，蛋卷，牛蒡漬，茶碗蒸與及非常精緻和果子！樣樣都好食，都係自家製，女士們睇怕兩個人叫一Set就差唔多。

另外兩次既日替定食，見到喇，都係咁勁，仲有原條烤魚（雖然我麻麻），真係唔講得少地抵食又好食。

呢個叫吉列五日市一口豚定食，朋友點既，我食過一件炸豚，炸漿多少少之外係好好食既，重點係，HK$108咋。

好喇，黎度晚市，佢係有八點前買一送一既。咁果次我地五個同事飲飽食醉，想知佢夜晚有乜食，可以黎呢度睇睇餐牌。未講食，先講檯面上調味料：

每款都有清楚解釋：邊款食肉邊款食炸物邊款食海鮮比較適合，好細心亦專業。

左邊，明太子，因為此店用炭火食爐端燒，所以好香口；右邊從上順時針：厚切牛舌燒，係要立即Encore既！烤蓮藕配松露鹽，未食過，好特別；烤魷魚鬚，無得頂，送酒一流！

漬物盛合，魚治既漬物係好好味，的確有日本家的感覺，所以此店非常多日本客人；厚揚豆腐，喂真係唔講得笑地好食，外脆內滑，所以又有Encore既！

其實唔止食咁少既不過就高興起黎無影晒嘛：純和雞雞翼，結果點左兩三份，又係因為好食：另一邊，炙燒味噌刺身他他，用紫菜包住炙燒既吞拿魚他他再加蛋汁，點會唔好食！

咁大火攪乜？好似每晚都有，邀請食客近距離目擊用稻草烤鰹魚，然後在座都有份食，一人一片咁，喂，好好食架播！煙燻味香到不得了！

據知佢地依家仲有Brunch任食，望過餐牌都非常吸引，唔得，要約人去試下先。