餐廳的電視

你對於餐廳酒樓有電視有什麼意見？其實現今香港人，望手機多過其他東西，於是，餐廳酒樓開電視，目的是讓大家用餐時有些東西看看，又或者晚飯聚會時無野傾，目光有投射的地方。不過絕對承認的是，就算是這樣，電視一直開著，相關資訊就會自動波地帶給望著的食客。

大膽估計，香港九成半餐廳的電視，不是無線都是無線新聞台。曾經見過有食店開著Now或有線的新聞，但非常少。大家都深知肚明，無線新聞多睇無益，一直在想，其實其他電視台（例如ViuTV），有沒有試過或者計劃以推廣方式利誘餐廳酒樓播他們而不是大台呢？慣性收視難改，人的惰性亦一樣，適逢世界盃無線無得播，有網民發起主動要求餐廳食肆轉台的行動。

需知道一般食肆開電視的目的已經不是留客，而食肆有電視睇亦不同於酒吧／卡啦ＯＫ講到明會播那幾場球賽，所以作為食客，你可以提出要求，食肆亦有權拒絕。當亞視仍在生（我知家陣復活左但身份唔同嘛），我曾經去過一些較大的茶餐廳，兩部電視唔同位置唔同方向，一邊播無線一邊播亞視。

至於酒樓或者大型食肆，有很多部電視，有時想看什麼台我都會開聲問，除非食肆是所有電視機從一個天線位出（家陣都好少會咁），否則食肆多數都會幫忙轉台的。

最近有網民表示，在父親節晚餐時，酒樓有很多部電視都播著大台。由於那時ViuTV正直播世界盃，他便問部長可不可以轉台。他問了兩個，都是答「沒有ViuTV，無得轉台，個電視係咁架喇。」

事主覺得不能接受這個答覆，於是找經理問清楚，結果經理將餐廳內部份電視台轉到ViuTV，然後現場有食客拍掌表示鼓勵。

事主寫這件事的目的，是希望大家要懂得表達意見與訴求，並且不要逆來順受接受不合理的解釋。這件可能是小事，但從小事開始，我們就應該有這態度。

當然對於此事有人持反對意見：

「開住播波食客唔走仲得了既。」「侍應仲要招呼埋你轉台咪好唔得閒。」「食飯就食飯啦睇電視點解唔番屋企。叫到人轉台有幾叻？」

然後有人講到「咁我好鍾意睇TVB做乜要轉台呀？」非常有趣，之前又話食飯唔應該睇電視，跟住講到人地睇開轉台就唔岩。

正如我之前提及，餐廳轉唔轉有絕對決定，若果經理跟事主話：「老細話唔轉得台」我諗事主亦無辦法更吹佢唔漲（ViuTV同myTV Super都可以免費電話睇直播），只是，提出要求，被耍，然後經理轉台，仲唔止轉一部電視，所為何事呢？

其實一眾拍手叫好的食客，可能有人問過同樣被部長耍，然後就算數。

記得阿爸阿媽都算舊一輩的人，他們以前對於我要在餐廳食肆反映意見時，時常都會話：「算啦，多一事不如少一事。」不過本人就唔多聽話，唔會大吵大鬧，但要講的要跟進的一定會做。久而久之，他們見我是有分吋知道如何合情合理地行駛食客的權益，他們都沒有再叫我多一事不如少一事，所以，找數埋單，往往又俾我搵到茶樓出蠱惑計多錢，就是因為我這種性格。

我絕對不覺得事主提出轉台有什麼問題，遇到部長們如此不專業的解釋再去問也沒有什麼問題。只是現今社會總有一班人，覺得「多一事不如少一事」，慣性喪失個人權益與表達意見的權利。

慣了被給予什麼就接受了，無乜所謂啦是但啦。

其實如此「無乜所謂」，人家要求轉台，你都無乜所謂的，電視你都唔睇既。特別是大型食肆的電視，通常都muted有畫無聲，電視開住都係隨便望一望，有幾多人會專心睇？既然如此，事主又不是要求所有電視不播CCTVB，經理再做多一部轉多幾部電視，咁事主做錯乜野？

會唔會經理都厚多士呢？駛唔駛小九埋經理？

若果茶樓想晚市生意好，講到明直播邊場邊場世界盃，再限定用餐時間，一樣大把人去食。

侍應轉個台只係用佢好少時間，我又唔知會有幾咁唔得閒。

如此推介食飯唔應該睇電視應該多ｄ同家人傾計既，我好想知佢地同家人食飯有冇嚴禁家人開手機與及望電視，定係，好耐無同家人食飯。

我還是建議大家，在你們還可以voice out的情況與機會的時候，盡量禮貌地表達意見與要求。也請不要教導你們的下一代，唔好多事，唔好多咀。強出頭可能有危險無著數（所以是要點技巧的），但慣性收口是非常不好的習慣，一陣連「大聲叫唔好」都因為你教佢既，到時真係唔知怨邊個好了。