2016年8月27日星期六

食個堅離地午餐:Picnic on Forbes

其實當港島西鐵路通車,作為中環人真係唔一定要係中環同人迫食貴野,有時搭幾個站地鐵,去西營盤港大堅尼地城食飯,可以坐得舒舒服服而用比較合理價錢食到好野。

最近去過科士街Picnic on Forbes兩次,其實都係多得師兄介紹,兩次同唔同同事去食,都食得非常滿意而且攬住個肚走。午餐其實有兩類:一種係比較平少少既,另一種三個Courses收HK$228。


平少少果個無記錯百五左右啦,食物選擇無咁多,但呢間餐廳絕對無俾行貨,仲係好好食果隻:
麵包新鮮熱辣辣而且好味,懷疑係自己整既。
呢個薯仔忌廉湯,睇得出每樣細節都有注意:薯味香濃,湯身好滑,另配上蔥碎,真係好好味好rich。
主菜:烤豬腩配忌廉自家製pasta。首先豬腩烤得好靚,而pasta好具水準配上綠色果條芝士,味道配得岩岩好。
甜品,唔駛點介紹,因為實在幾高班。雜莓加上奶凍,一食就知好味。

第二次,食三個Courses午餐,先揀左呢個:
介紹番:有蛋啦,Parma Ham,露筍,三文魚,蝦。一上檯已經靚到不得了,而且味道調得出色,無辦法唔完全食晒。

主菜方面,我選左青口蜆肉Pasta:
水準一樣高!即咁,Pasta自家製而且蛋味香濃,其他配料恰到好處地配合,清爽而對味。
同事的牛仔肉,俾左舊我食,入口即化,煮得好好啊。

甜品控既朋友,唔係得個樣,係堅好味,從上檯到食完,視覺與味覺都得到享受。

據知逢星期四朝早有海鮮直飛香港,所以晚市有Seafood night,而平日晚市仲有法式燒春雞好受歡迎。都係咁啦,好餐廳趁佢仲健在就好去食喇,建議訂位。

沒有留言:

發佈留言