上環好好食（四）

某食店爆出試食只可給正評的醜聞，心涼之餘其實究竟網站評論可信程度如何呢？口味人人不同，但我對於食評就唔多參考，食物餐廳照片倒會看看。

今次介紹兩間，一間食川菜，一間係韓食。希望岩你地口味，可以上環食Lunch多不同選擇。


醋娘子，光顧過兩次，兩次店內均寫住試業，而問題係落單比較亂，等候食物時間較飄忽。不過上星期行過見門口放好多花籃，我諗應該正式開業喇。

先介紹午市食過乜：

午市套餐選擇不少，第一次食的，是麻辣牛肉麵。湯底不俗，麻辣平衡而且有料到，我直頭鍾意飲，牛肉最驚喜，入口即化，不過最有趣係，佢用上公仔麵黎煮，唔係唔好食，不過真係怪怪地。

至於麵食附上小菜乃海帶片，可以的，同時也送飲品，四十幾蚊。

驚唔夠飽？午市加十八蚊送四隻小籠包，皮有點厚，但爆湯又幾好食，呢個價錢絕對可以。

第二次，食呢個水煮牛肉跟菜飯。水煮呢個汁好得好好，越食越麻，而有有紅薯粉芽菜芹菜，牛肉水準可以。此餐好似五十幾左右。

同事點既上海粗炒，佢話好好食，不過似乎份量唔多。

鏡頭一轉，我地去呢個文咸東街既梨花園。首先要記住，午市好爆，但俾電話訂位，所以，識做喇。午市選擇好多，而且唔駛加一，咁不如先睇下配菜係乜：

兩位就有五碟，若果你識得叫疑似菲籍侍應幫手，佢地係可以同你添多一碟。以上，正宗好食囉。

第一次食，特濃牛肋骨湯跟飯。話你知，呢個湯好鮮甜，牛肋骨鬆化有牛味，湯越飲越暖！

第二次，專登揀星期四，典解呢？呢日先有人蔘雞套餐，一舊水咋！

份量十足！我係食唔晒既！首先湯是充滿膠質，人蔘味輕但食得出，而雞入面釀有人蔘糯米紅棗等食材，雞肉依然嫩滑，呢個價錢，晚市食同一道菜（可以大份ｄ啦）要HK$280仲要加一，難怪星期四人特別多，而好多人都點呢個，所以，可能係會無的－－即係賣晒午市份量咁囉。

食晏考慮下呢兩間啦，都好唔錯！