與的士大佬就佔中的對談

星期一早上，如常上班。因為要出外開會，故找巴士到信德中心乘地鐵。進入上環地鐵站，人很多，但香港人的素質很好：大家都靜靜的排隊，沒有鼓噪，慢慢入閘。當然，也有些唔生性的，在人多擠迫的時候落樓梯還在篤電話，但大致是很好的。我假設是香港人知道為了什麼人這麼多吧，若果換轉是港鐵服務出事又另作別論。

會議很成功，離開時，決定乘的士。上的士前都問問司機，我要去的地方，可以嗎？他表示，要兜點路，可以的。於是，上車去，休息一下。


我並不是一個喜歡跟的士大佬搭咀的人，不是扮野，而是跟你不熟，笑笑口講兩句就算；況且早前有朋友告訴我，香港有為數不少的的士牌已屬中資公司，而朋友們亦的的確確試過，有的士司機主動問他們對於一些社會事情的意見，簡單來說，就是收風。

這程的士原本沒有什麼對話，直到到達某處，我問：「咦唔係行呢邊咩？」司機大佬禮貌回答：「朝七晚七唔行得架！」「哦！唔該！」「唔駛，睇你都係講道理既人，我好放心播。」於是，我們開始談起來。

司機大佬告知，他廿幾年前是當差的。有關星期五六日發生的事情，由交通而起，他便說起來。他覺得一切都由催淚彈而起，但他講得跟多的，是警方的處理。

「老實，我都唔多欣賞黃之鋒，可能同你年紀有分別既原因啦！不過我覺得，果晚警察錯晒。其實佢地要爬入公民廣場，根本唔駛咁緊張，咪由佢地爬囉！到時跌傷又好跌死又好，都唔關你事。佢地入晒去坐，若果佢地郁手要闖入政總，你出師有名丫嘛！」

這個我也表示同意的。他繼續分析。

「一爬就郁人，仲要揀果幾個學生領袖黎捉，捉完，破壞晒規矩拘留，仲要玩晒野上人屋企搜，你咁做擺明迫香港人出黎撐班學生嗟！」

「擒賊先擒王，都唔知邊個傻仔諗出黎。」

我說，是啊，根本無必要玩政治針對，他們這樣做，很多原本不打算出來的香港人開始忿怒。

司機大佬繼續說：「跟住好喇，迫左班人出黎喇，又唔俾人過，迫迫下人越黎越多，實出事啦！」

我說：「最弊就係，大家眼見報導，睇唔到點解佢地要出催淚彈，又拉開人口罩噴胡椒噴霧。」

「呢Ｄ咪叫上晒腦囉！做到慶晒都唔知自己做乜，上頭落Order叫你掟，你都唔好好似當人係仇人咁，咁依家成件事警察咪蝕晒底囉！」

我說：「係呀，依家資訊發達，做乜都俾人拍低，又俾人影到咁又搶人手機，咁失晒分架。」

的士大佬繼續說：「我當年都試過同班議員開會，我知佢地唔會對呢件事唔知情，梗係最高指示警察先會做野啦。」

「我當年就係因為唔想做咁多不義既事先唔當差，當年班鬼佬好醒架，叫我地用警棍，就算打都打腳好喇，但你知啦，下面執行果班，有時真係無性，叫你兜頭兜腦打落去，我做唔出。咁打法，人咁就一世架喇！所以果陣我舅父都當差，我眼見唔少野，我同老婆商量過之後，就決定唔當差囉。」

由於我們是在途程尾三分一才開始談，談著談著，就到目的地了。

我慶幸這次的的士大佬不是跟我說一堆不堪入耳的歪理，而是理性的討論。