跟反佔中撐CY的人對談

經過這兩天，作為香港人，我感到自豪；個人來說，有點慚愧，因為我沒有站出來，仍然只是一個鍵盤戰士，極力盡可以做的事去支持這件事，支持我的朋友。

當聽到有朋友因為這事而發現有些朋友因了解而分手，在面書進行清洗時，我可喜的看見我面書的朋友大都立場一致，而且有良知與同理心，就算沒有跑出去的，都為這件事，為催淚彈開始發放，為那些活生生的防暴警察向市民施暴的片段而難過。當然，有好些是沒有發言的，甚至懷疑他們是不是已經把我隱藏了。不過今晚，其中一位，在messanger跟我談起這事。


她是工作上認識的，很多事情都談得來。她已婚沒有子女生活富足都可算身光頸靚。我沒有預計過她會突然跟我談起這件事，她先由CY說起。

她首先覺得，雖然CY不算做得好，但他敢跟地產商作對出辣招，若果唐唐在任，肯定不會這樣。話題一轉，他就說：點解班議員既仔女唔出黎示威遊行罷課佔中呢？

我純以非常理性的角度跟她說：「唔好講議員仔女，每個人都是獨立個體，阿爸阿媽叫我做乜我都唔一定聽啦下話！」事實是對的，在這件事上，我跟老父今早才有點小爭拗，不過沒傷感情。所以，他信的，我信條毛？

她便說：「佢地邀請市民出黎，點解唔帶埋仔女出黎呀？怕仔女有案底？若果佢地覺得錯，佢地係咪應該諗下唔好發動呢件事呢？」

我說：「每個人都是獨立的，你估咁容易俾人煽動出去咩？你唔了解現時既年輕人，佢地若果咁易聽大人話，老師就安樂晒囉。」

她於是傳了一張今天我也在互聯網看過的照片：是幾位民主黨成員在酒樓飲茶，然後就說：「你訓街，我嘆茶，班細路俾人誤導晒出黎做死士！政府係有好多地方要改，但唔好咁害班細路嘛！」

我非常冷靜地跟她說：「呢張相話佢地嘆茶果陣，佢地已經俾警察拉左喇播。」當然，我不會跟她討論，五毛質素欠奉啦。

然後到我轉話題了：梁先生政府下令出防暴警察與催淚彈，呢一著，肯定錯。

她竟然如是說：「成日話佢地手無寸鐵，如果手無寸鐵係你屋企徘徊勸極唔走，你會唔會趕佢走呢？仲有呀，果度唔係公眾地方嘛，成日信埋報紙寫公民廣場就係公眾。」

「有城規會文件顯示果度係Open Area播。」（註：這方面我的確未能證實真偽。）

「佢地掟水樽呀！手無寸鐵。」

到此時，我已經知道，繼續講落去，都係徙＿氣。

她還說了：「依家ｄ人好易俾傳媒影響，果班話支持既人，又唔出去？淨係識係上網寫野扮型就支持。」

即係話埋我啦咁。

我繼續平心靜氣：「咁即係我啦，丫其實你個Friend咩咩咩都係咁播，你有冇同佢傾下咁呢？」

「我會，我呢個星期會見佢。」

「呢班人呀，收錢做野架！又唔叫埋仔女出黎，佔左喇又話自己控制唔到，Cheap到死。」

我決定放棄：「學生真係無咁易俾人利用，不過算啦，大家唔同睇法。我要沖涼喇，遲下出黎飲野啦，不過唔好講呢樣野喇，ok?」

你問：為何我不Unfriend她呢？工作上的朋友，又不算深交，其他事情都可以溝通，況且又不是時常見，她只是私底下跟我談這些，我還可以接受。相反，若果那些在面書貼出支持警察防暴最好出埋坦克之類，我二話不說，unfriend and block。

事後，我跟她的好友ｘｘｘ提起這事，因為她可能會跟ｘｘｘ又談多一次。ｘｘｘ很有趣地說：撐CY既人諗野係特別D架喇！

我跟她說：你同佢咁死黨，你有機會咪同佢傾下囉，我就唔會架喇。

是的，這就是撐CY反佔中人士的想法，或許她找我說的原因，是我在面書說了一句：

唔知聽日股市大跌，班離地中產會唔會走出黎怨佔中呢可？

還是要睡了，仍在外面的朋友們，保重；警察們，別成魔，回頭是岸。