年近歲晚，我相信唔少朋友未必鍾意出街迫！既然係咁，今晚就送上慧嫻姐既西歌推介！其實慧嫻姐與寶記合作多年，未講西歌之前，慧嫻姐多年來唱片封套勇於嘗試，都出現過不少好爆但反應欠奉之形象，特別係於跳舞街掃街茂造型之後，紮起個髻既品姨Look大唱變變變，到後來學成歸來正常左幾張唱片，突然配合唱片名稱《問題女人》整個紅色假髮，當然不得不提扮麥叔叔果個Look啦！
好，入正題，慧嫻姐派台作品當中，都已經有好幾隻西歌，咁不如先由大家熟少少既開始啦！
此乃本人聽到家陣都覺得西到爆既派台歌，無錯，又係出自十六嘩佬既林敏驄先生，地球大追蹤！
我一直懷疑呢首歌既姊妹作就係作俾玉女敏既另一西歌，下集先講。但呢隻，歌詞西爆，而慧嫻姐每次演唱會都唱，真係，唔知講乜好。
又係驄哥！呢首問題女人真係當年一聽我已經頭痕：「飄呀飄呀飄，這方格的褲管，也裝滿」，當然，仲要配合迷幻唱腔與及佢呢個好似有精神病既mv啦！
鏡頭一轉，黎隻超舊歌：花店大碟內呢首叫監視眼睛，我相信係當年林珊珊連鎖反應系列既朋友，填詞果位叫卡龍，而呢隻歌最重要係個beat好難catch，所以如呢類歌詞『一班反斗星扮正經，個個着上了豹 Mink，天真都收工像天氣未變清，個個變作北斗星』你可想而知，填詞，係可以幾是很但。
卡龍先生貫徹地西，呢首無聊的警告的確係佢個人心聲：「求其做人可算數，不必傷透大腦，平時做埋ｄ小報告，終於躍升元老」都唔知話佢勵志定係乜，聽完，會唔會講粗口呢？
又黎番隻派台歌丫！呢首不住怨婦街其實可以架，不過我又忍唔住想分享呢個mv：佢既舞姿，實在係一絕！
又有一首超舊歌，歌名好普通：熱愛，係一首好是是但但既快歌，聽下，留意歌詞，就會明我點解揀佢俾大家嘆：
去到好後期，轉左去新藝寶。其實愛戀二千小時好好聽，點知第二隻碟無論形象與歌曲都出事，當中呢首出自林夕手筆佢扮少女唱既想算命，實在有少少Over左。
試聽：http://www.tudou.com/programs/view/t64XzB8V6Q4/
最後，送番兩首經典MV俾大家，特別係未認識當年慧嫻姐既朋友，呢兩隻，你一定要睇！
當年寶記無歌手拍果d 啦啦ＯＫ都好好笑架！在此希望慧嫻姐新一年復出帶番多Ｄ好歌俾我地啦！
沒有留言:
發佈留言