我的2024廿首廣東歌：廿首以外

有好幾首歌，其實幾唔錯，但又未至於入到廿大。當中，有部份更係「唔好講你估到連我都估唔到我會介紹佢嘅歌。」

有部份歌手，好耐好耐無出歌，再出，製作比以前出色而有心嘅作品，有部份則從自己出發，除了誠意，還有內容。

陳慧琳 一念天堂，二人結界

曲／編：雷頌德 詞：朱琳 監：雷頌德／楊振邦

我好欣賞歌手Come back做新歌，而佢前年出幾首，上年有呢首搵返老拍檔雷頌德嘅快歌。陳慧琳ｘ雷頌德，曾經殺盡油尖旺，然後來到2024年，呢首充滿九十年代retro感覺作品，節奏唔算好快，但型，真係型，而佢係vocal方面比以前更精緻，所以首歌一出，的確耳目一新。

鄧麗欣 黑夜孤寂，白晝如焚

曲：戴偉／李宥熺 詞：陳心遙 編：陳易行 監：戴偉／陳易行

戲我就無睇過（聽講唔係好得），而Stephy姐雖然近年因為集體回憶好多人追捧，但對於佢唱歌，我都係非常有保留。不過呢首電影主題曲，你地聽下：真係幾穩幾有感覺，旋律動聽，佢亦掌握得好好。

馬天佑 受傷

曲：馮穎琪 詞：王樂儀 編：Perry Lau／劉香瓊 監：CMGroovy／馮穎琪

好好好好好坦白，我好唔得佢個人，而呢首歌係有一次KKBOX Random飛俾我，我係覺得，咦，好聽，邊個唱？Listen without prejudice，佢為自己再一次整型唱呢首歌，你就當乜都唔知，個mv亦唔係好見到佢，聽下，馮穎琪王樂儀播！

和田裕美 最佳女友的自我修養

曲／編／監：Patrick Yip 詞：林雨辰

裕美喎，仲停留喺Yamete Yamete搭錯車，又或者佢果位極品男友。然後果陣見佢出新歌，無錯，寫自己最容易投入最容易被感動，於是呢首最佳女友的自我修養，又係Listen without prejudice，你係可以舒舒服服聽晒，佢連高音位都處理得唔錯。

姜麗文 要說快樂太虛偽

曲：姜麗文 詞：Oscar 編：賴映彤 監：賴映彤／姜麗文

我知佢係邊個，但，完全唔熟悉佢嘅音樂。有一日聽到呢首，果種悲從中來，感受得到。後來得知，原來係有關佢多年患有抑鬱症，又係可以唔駛知佢係邊個，Oscar填詞，小彤編監，睇下你鍾唔鍾意。

江若琳 一圈

曲：吳林峰 詞：陳詠謙 編：黃兆銘 監：吳林峰／Viki Chan

對佢以前嘅歌，無印像。呢首，係關於一個人從出生到長大到老，感受著人生好似行左一圈，睇返轉頭，原來已經經歷好多好多。吳林峰陳詠謙喎，江若琳或者經歷結婚生子，唱出果種感激同頓悟。

力臻 我的課本留白處

曲／編：力臻 詞：Oscar 監：Bert744／力臻

佢唱Citypop或者跳脫作品我幾喜歡，而呢首，有故事，因為佢唔能夠再於學校教書，於是唱左呢首，獻俾佢教過嘅學生。自身故事，有感情，而我最深感覺係，太好喇，新一代終於有一首新嘅畢業歌。

王智德 非物質文化遺產

曲：Nekothemeow 詞：王智德 編：鄧東城 監：李一丁

一連出左四個成員四首單飛作品，Alton呢首係我覺得最高質聽得最多：要Rap就要有態度，而唔係為Rap而Rap，呢首詞，有自身經歷，有自嘲，唱得夠groove夠格夠有火又剛剛好，我相信其餘十一位成員，絕對唱唔到呢個感覺。

葉振弘 半途而廢手冊

曲：Lesta Cheng 詞：黃偉文 編：黃兆銘 監：周錫漢

其實整首作品旋律題材並唔特別，係聽得舒服，能夠令我一聽再聽，或者係佢A0身份，佢唱出歌中主角果種守候到自己頂唔住想半途放棄，而實際係，諗就咁諗永遠做唔出。

呂爵安／陳凱詠 漸漸我們

曲：Matt Chow / T-Ma 詞：亞木 編：Matt Chow 監：T-Ma

係，我唔多鍾意Edan唱歌，但呢首佢個Vocal處理得好好，無左咁種唔斷氣拖音與及鄉音，Jace唱得好好，然後兩個人嘅合唱係有火花，有果種一段感情走到盡頭嘅不捨與無奈，應該係我覺得近兩三年最好聽男女對唱情歌。我會想起前年我常聽嘅陳蕾與張天賦果首，有幾老土到震，都唔好攞MC上年唔知做錯咩事要同國際知名女歌手合唱果隻。