我的2024廣東歌樂壇

今年都會揀廿首歌！不過今年想做多少少，我究竟2024對於邊幾位男女歌手嘅歌最有印像。或者當中有你可能錯過，又睇下合唔合你口味。

頒獎禮都係用黎討論，但麻煩自己搵歌黎聽，好唔好合唔合自己口味都要聽過先知，當然最重要真金白銀支持你覺得好嘅歌手啦！

男歌手

吳林峰：我都略知佢去年做緊一件事，兩個星期出首歌（我無記錯？）產量極高而當中好多好歌：過癮嘅社恐人士應對手冊、叫大家要記得呼吸活著嘅呼吸困難、關於音樂創作人心聲嘅豆豉、描述情緒病朋友世界的心後事，離世的跟留下的心聲風。今年三月初會係西九有專場唱呢廿幾首歌，記得支持！

林家謙：上年高產量仲幫左好多歌手寫歌，出左個人廣東同國語碟，當中曲詞編監無答案我聽左好多好多次、廣東歌呢款只此一家喃嘸師感觀漫遊、寫俾林宥嘉合唱廣東歌瑪莉晚安了、首歌比套戲更好嘅普渡眾生。八月開演唱會？應該仲有新歌出啦！

女歌手

Sica，無諗過上年出幾首歌都好唔錯：再見有時特別係周國賢Featuring版本好好聽好有感覺，經痛不及我心痛有血有淚又好笑，少女心事小鹿亂撞外星少女失語症、成功搵到林家謙寫左首鼓勵自己更鼓勵好多人嘅我們只有一往直前。其實佢唱亦唔差，當然佢唔係賣唱功，但整件事Sell出黎好有自己想法。

Kiri T.：無錯，都係由至少要做一件離譜的事認識佢（J.Arie唱返又好好聽架播），把聲好有character，外型又唔錯，然後去年我亦非常喜歡一定係有些話要用英文說，仲有馮允謙寫俾佢嘅傷心的時候別說話。

Serrini：上年出左隻好好好好聽嘅碟，當中樹之呼吸唔知點解聽得我好心痛，坦然面對自我脆弱傷痛的月色魔美，接下來新一章鼓勵各位女性自主的女一，就係永遠估你唔到，又有突破又有Message。

組合

My Little Airport：過往好多好多年見樂評朋友大讚但我又無認真了解過，直到去年一聽然後一口氣買晒過去十一隻碟，然後喪loop，然後買飛睇演唱會因為太大雨睇左一半放棄左但相信仍然會再去，好鍾意，就算遲左鍾意。去年呢一首一個眼神，聽聽下都會諗起一啲往事。

新人

上年新人有幾首作品值得同大家介紹一下，我係幾喜歡嘅：

Winky黃健怡，我和愛麗絲絕交了。旋律動聽然後佢唱好好，果隻好係有質感，係唔駛留意歌詞都被吸引。

跳唱作品要型要有霸氣要夠Groovy，芯齡呢首第一首Solo SPYLING，的確好高分而且好入腦！

未睇佢叱咤當晚唱得咁好嘅表現，我係幾鍾意呢首曾傲棐嘅密友圈之謎：果種青春跳脫然後又唱得好紮實。

留意林愷鈴唱歌，係我睇《瑪嘉烈與大衛：絲絲》聽到片尾歌You，原來係佢曲詞創作！而叱咤當晚唱嘅好奇，我都好鍾意。

我對Alton無乜特別感覺但呢首個人作品非物產文化遺產，Rap，咁先至係Rap，有態度有訊息！

造星嘅Rover，上年有呢首男孩子不要流淚，我誠意推介俾好鍾意Dear Jane果堆歌嘅朋友，你一定鍾意，仲要唱得好過依家嘅Tim。