播完差不多十日，有無朋友跟我一樣好失落？為免無咁失落，我睇完立即再睇一次，無錯，《IT狗》播出果廿集，我同一班朋友好開心，有時更乖乖坐定定睇直播，然後一邊睇一邊吹。當中有IT界的朋友不斷表示「喂呀男Ｂ真係好鬼似我同事」之類之類，追電視劇（仲要身邊好多人一齊追）係一件好爽嘅事。
究竟呢套係咪喜劇咁簡單？唔係，肯定唔係！當中有關追尋夢想係一個題目，有關初創又係一個題目，仲有危機處理啦公關啦甚至有關Teambuilding之類都精準用一兩集有趣介紹，當然仲有最後一集好多好多比金句更有份量嘅對白，又點講得晒呢？不過套劇咁成功，我非常堅信，選角有極極極大原因。
被Cathy形容為「成條Team可能最正常」嘅蒙玲，應該係幾位主角性格上比較唔難演：係，佢經歷過情傷，但同樣佢都相信信念與理想，只係佢比較入世，而且冷靜分析，同時亦應該係成班人入面最能夠同人溝通果個。由於蒙玲其實係祟拜阿信，其實信念類似，所以佢都唔係好需要朋友，而整個外觀都係宅宅地，有留心嘅朋友會發現佢檯頭擺左一間好似好溫暖房間既微模型，反映其實佢都係一個好溫暖嘅人。陳漢娜演技好，要好型又得，而佢外型的確有果種表面望落拒人千里，所以當佢好激動對阿信（有兩次嘅，阿信戇９９俾人鎖左入微笑鎖，另一個大家一定知），果個反差就更明顯喇。
Kenneth擺到明就係以當年眾籌咖啡機騙局兄弟作藍本，所以劇集開初佢果種齋吹水好自信性格係好出，而岑珈其演呢個角色當然無難度。除左同bornhub各人相處之外最多當然係佢大學講書，大家都肯定有遇過無料到嘅Professor，佢將呢種講師嘅衰格抵死演活，當然與大佬重遇希望大佬唔好再錯落去果一集，係感動嘅，呢類戲，唔會難到珈其啦！
講到Kenneth一定要講星之子Tony：少年成名，一路最引以自豪就係呢件事，而佢亦一路囉住呢件事自豪地話俾人知我好勁，在人前撐住自己好自信，面對自己就好質疑。當中最讓人深刻一定係佢以為俾Moby賞識入到去先發現俾人無視與奚落，迫不得已承認自己其實一事無成，再講番成長故事，啊，Lokman真係入型入格，要攪笑抵死又得，真係要演出Tony嘅激動又做到，係嘅，Lokman真係識做戲嘅！
男B可以話係由頭毒到落腳嘅IT人，我人生當中都識過呢類人，而佢地多數都係高手，我電腦有乜事一定問佢地嘅！劇集無乜提男B有乜特別人生遭遇，但佢果種毒男沉迷遊戲世界見到靚女反應成件事非常立體，所以，陳湛文演得唔止好，直頭係讓人難忘！無論與女B鬥咀定係同一邪交手，好笑抵死，與阿信Tribute英雄本色果段戲亦不能不提，好勁架！
女B性格亦好明顯：女權至上，亦係有果種堅持信念就唔會放棄嘅性格（其實成Team人好幾個都係咁）。發生係佢身上嘅事，包括以前幫女同事出頭結果被出賣，又或者俾Shirley過橋抽板，Yoshi係演出到位。你明白嘛？佢身邊對手好多個都好好戲，交到戲又唔難睇，已經非常高分！
Never與Johnny仔係劇入面都係性格好鮮明而負責攪笑，但又不單單攪笑：好似Never「樂觀地悲觀」非常貫徹，果種無自信無表情的確好有喜感，講說話無起伏用一個tone，演得到係會好出位。其實唔好以為好易演，因為此角色只要演得過火就會無左果種真實感，所以，Frankie肯定有花心機去鑽研，從小動作或者同玩具交流等等都令人覺得Never就係咁；Johnny仔就第一刻出場已經回答阿信一句：「上天囉走左我啲乜？」 搵來鄧子超去演，外觀上已經成功令觀眾明白劇集想帶出一個訊息：你係咪同阿信一樣已經對佢stereotype？於是，Johnny仔就算戲不多，佢嘅突然成功發達同樣堅持佢藝術家性格，同時亦有出手去支持阿信，大家絕對唔會唔記得呢個角色，更加一定會愛上披皮！
本來一路睇覺得，點解Stanley演嘅Marcus咁少戲份呢？原來好戲在後頭！就算係咁，劇集都成功舖排呢個角色：麻省仔，有資金有vision去科創，點睇都比起阿信準備更充足。佢本來唔係壞人，佢亦希望初創成功，但結果贏得比賽與資金有投資者都係失敗收場（仲惹上官非），但佢唔介意從頭來過，直至遇到阿Lou，機會來臨，佢更加努力，甚至不擇手段——某程度上佢變得不擇手段因為佢面對阿信面對PayPayDuck，佢覺得唔公平唔忿氣，所以出手更恨更辣。Stanley演得當然好！從最初果種自信麻省仔（你唔鍾意佢應該係你平時唔抵得呢種優材），到後來成為阿Lou跟班，再過埋阿Lou頭，一場又一場戲都話你知，佢唔止有外表，佢演戲仲好Charm！
阿Lou，你以為佢只係阿信死黨搵佢笨去見女網友，然後唔明佢做乜想破世界紀錄廿四小時踩單車發電，原來劇集又有舖排！佢同樣經歷被裁，一個契機成立Loutivation，其實佢只不過係另一個Kenneth阿哥，希望靠吹發達，佢知道自己唔夠料，所以佢睇中阿信嘅PayPayDuck。佢都曾經欺騙自己唔係害阿信，直到最後可能因為發現自己竟然被Marco迫到無定企，再諗起與阿信一直以來所經歷，在最後一刻講真說話（咁嘅侵權訴訟又拍得兒戲左少少但明嘅）。周祉君交足戲，特別係成為Loutivation人生導師之後，果種要呃人要先麻醉自己嘅自信你一定相信。
我又點可以唔提開開呢？好佩服編導捉住部份富三代嘅特質創造開開呢個角色，有朋友話聽到開開叫「爸爸」就想打巴佢，即係好成功啦！開開果種入世未深離晒地真係好正：「全香港最雜就係IFC」「我仲未準備好去真嘅茶餐廳」你點會唔記得？同Never咖啡機前果段戲到依家我都覺得勁好笑！Locker平時係試當真演下把位，但開開呢個角色果種無知天真實在可愛又嬲佢唔落，好成功呀！
寫唔到咁多，最後提提就係：無諗過彭秀慧演嘅Cathy係由頭帶到尾！記得之前《演員。門》佢都提大家其實佢都係演員，相信呢套劇佢過足戲癮喇！朱柏謙演嘅萬鈞，唔駛講，大師級，果種Convicible並唔係是但一個演員可以演到，佢係咪大奸角呢？在商言商未必，所以佢唔需要演出果種大台奸角嘅乞人憎，但科創界大佬演得實在太似太有說服力喇！Jeffrey初次演戲演出學生Jayden，無論同Kenneth攪對抗到佢入PayPayEgg之後都演到果種未入世好天真嘅理想派青年，原來佢係跟彭秀慧學做戲！仲有扮演Shirley嘅陳嘉寶，能夠將呢個好有機心嘅角色演活，令人覺得佢乞人憎但又相信你身邊總有呢ｄ女，絕對係佢嘅代表作！當中好多瞬間變臉面不改容的確演得好準，最後與蒙玲見面果段戲，亦為Shirley呢個角色平反（再次一讚套劇所有人物都寫得好全面立體）！
呢部真係難得精彩嘅好劇，演員真係無得頂，劇情發展又睇得開心又言之有物，你無理由未睇過卦？
唔該一定要拍第二季，一定有得拍落去！
沒有留言:
發佈留言