睇《單身即地獄》可以學到乜

新年快樂！以為今年可以努力少少寫多少少結果今日先寫第一篇！我其實仲有好幾張唱片想介紹不過先寫呢篇：因為打鐵趁熱之餘，我肯定可以好快寫完。

Netflix呢期大熱節目肯定有《單第即地獄》！類似男女配對真人騷一向並不特別喜歡睇，不過因為今次八集之嘛，好快又睇完，結果真係睇完。睇果陣你可以投入肉緊一下，但大家都心知當中一定有節目效果唔係全部真實，咁享受完娛樂性又或者養眼度之外，究竟睇呢個節目又有乜野得著呢？

首先講解節目玩法：一開波五男四女一同到達一個稱之為地獄島，當中有機會互相認識又要煮食又住埋一齊（男女各一個帳幕），唔可以透露自己年齡職業，第一日就有機會向你心儀對像表達（但要匿名）之後就有唔同形式配對，互相喜歡可以去天堂島拍拖一天。

節目共八天分八集，去到第五日出現多兩個女一個男，呢個設定幾好玩：因為頭五日大家困獸鬥已經有心儀對像亦有人多過一個人爭，當新人出現究竟你會貪新忘舊定係堅守最愛呢？而新加入者又點樣敵過缺少幾日相處呢個不足呢？

竟然我今次係寫究竟睇呢個節目學到乜，當然聚焦呢方面。人嘛，通常在愛情當中都當局者迷，旁觀者不一定清楚，但就算節目有機會並不真實，幾位參賽者在求愛拒愛選擇對像都有值得大家參詳參詳的地方。

其中有一位很受男士歡迎的女參賽者，面對不同傾慕者的進攻，每個回應都非常值得大家研究。姑勿論佢真係未決定到定係決定唔到，此女子對住每個傾慕者，永遠不單在眼神表情上放電，而是說話永遠能夠讓你覺得：「丫其實佢對我都有好感我又未輸晒」又或者「我應該高分過另一個」的感覺，呢類似是而非的語言偽術，的確能夠令某一類傾慕者一直俾佢吊住。

識得講唔代表講得出，講得出仲要配合表情演技，否則對方又點會落搭呢？當然，此女子其實唔多靚，不過好有米同好有身材，我唔排除果幾個男嘅早就被迷到唔理佢講乜。

反之，有另一個都好受歡迎的女參賽者，早早知道有其中一人對佢非常喜愛，佢就非常早就覺得「喂咁我真係無Feel嘛唔好攪人啦」，絕對不想令對方覺得有希望，此等做法又是另一類人，可能佢好清楚自己喜好，但更有可能係，佢唔想亦唔駛收兵。

所以當節目後期，果位極死忠傾慕者在早幾日自尊心已經被打到所餘無幾，竟然最後仲堅持追求，而兩人首次單獨到天堂島約會心態又唔同左：男嘅不再進擊而是希望開開心心與喜愛嘅過一晚，女嘅因為男嘅自然表現重新認識此人，發覺佢原來有其吸引處與優點，於是，故事有不一樣發展。

愛情世界往往都係講Timing，但同時呢，唔一定代表你死心塌地一定等到。

此位痴情漢又有野俾大家學習：佢原本真係接近死心但堅持落去，喂好喇，你之前用咁多招都唔work打動唔到個女仔，你仲有機會俾人重新認識你，你係咪應該用唔同嘅approach去表現自己呢？呢樣好重要，死纏爛打肯定陣亡，用下腦，唔好太著緊，可能有意想不到效果。

講到死纏爛打，有一位女參賽者，早早就好似同另一男參賽者互相喜歡，以為去完天堂島之後就認定（條仔仲講到「我淨係會同你去天堂島」之類甜言蜜語），不過之後發展令佢覺得條仔好似玩緊佢咁。此女子當然進擊，但其進擊方法係：搵單獨相處機會然後接近質問對方：點解你咁咁咁，你知唔知你咁咁咁會令我唔開心之類之類。

愛情世界唔係你以為你就係，雙方關係未認定，你見勢色唔對唔開心，fine！點樣玩落去點樣爭取又係講approach。佢呢種死纏爛打，可以講好多男嘅會被嚇走。

所以呢位好似好Desperate嘅女參賽者同時向另一男仕進攻，又係太進擊太坦白，令該男仕怕左佢。

仲有乜野可以學到呢？當你去唔到天堂島／你最愛果個跟第二個去左，係咪代表你玩完呢？

其實留係地獄島面對其他參賽者，你可能有更多機會去認識其他人，又可能會發現：咦原來呢個我一直無留意都唔錯播。喂，唔駛咁快收自己皮的。

無論如何，呢個節目係一個幾好睇嘅娛樂節目，希望大家除左評頭品足之餘，攞啲野走，學番少少，等自己唔好犯同樣錯誤。

新一年希望大家有所進步，各方面都係，共勉之。