小盆栽

四十幾歲，算是活得還可以，還是不停提醒自己千萬不要成為老屎忽，同時記得活到老學到老。當然不能夠任何時候都做到，但有時在事發之後，可以獲得反思都非常重要。

這次的分享是：大約年多前，管理員問我：「唔好意思呀，唔知你冷氣有無吹向天花呢？樓上住客話地下凍到出晒水喎。」我立即回家檢查，「無喎！」管理員跟我說：「係囉都無理由咁架可，我同返樓上住客講。」

以為事情告一段落，點知，一年後，管理員又告訴我，樓上住客又有同一投訴。今次我答得更快：「上年問咗啦，無播！」返到屋企，我決定打電話再俾多個Option管理員：「不如咁丫，佢地下有濕，打俾你哋，你哋上我屋企望下再同佢講番囉！」

於是乎，我無收到任何消息，我以為已經解決，直到有一日返到屋企，門口有一小盆栽，另外有張便條，內容原文照錄：

Thank you for taking care of the air conditioning situation! This is a small token of appreciation.  Please accept it!

那一刻，我呆咗幾秒：攞返上樓上，又好似好小家；收咗，又好似證實係我錯。

我諗唔通，接收咗佢，養到依家。

事後我想想，喂，真係學到野！

雖則我有聽講樓上住客係教育界，呢個放盆花貼張便條嘅做法認真要學！我就當佢真係解決問題，無論關唔關我事，佢出呢一招，大方得體友善，你唔收囉返上去又整張便條的話，即係同佢交惡啦，我又唔想咁！

於是，呢個無得輸嘅處理手法，我每日淋花都提醒自己，要學識呀！

其實年紀漸長，非常明白一件事，並唔一定要為意氣之爭而開炮，若果道理在我這邊，請用最無情緒最對事不對人嘅方式去回覆。而且就算道理在我手，其實都唔一定要贏到盡，有時留一線，擺出一副表面雙贏的局面，大方得體，對方或者會感激你，當然亦有可能吹你唔漲。

究竟到實戰時能夠用上多少絕對因人而異，不過請記住，少一個敵人總是好的，仲要佢係你鄰居。