2016年10月4日星期二

BJ單身日記:生得啦Baby:盛女的FF

究竟第一與第二集BJ單身日記距今有幾年呢?我無心機去找答案,只知第一二集都有看過(應該在電視或者VCD),而第三集,相信會幾好笑,於是入場看了這部Bridget Jones' Baby,個多兩小時,笑到肚痛。

故事設定如下:BJ已經四十有三,與Mark Dacy分手五年,對方另娶而佢就成為單身貴族——貴族如何定義因人而異,至少佢有事業仲有d市場。Dry得太久,希望有新衝擊,結果就...



當事人與女同事參加露天音樂派對濛查查與一型男執左劑,無諗過有下聞,十多日後參加好友女兒洗禮當God Mother,又有咁岩舊愛Mark係God Father。其實兩人早前在Daniel喪禮遇上(要是你唔知邊個係Daniel的話,嗯,Hugh Grant,花花公子,第一二集都有爭過DJ)已經非常老尷,今次再遇原來男既已經離婚女既仲好愛對方,於是,兩人再次撻著,不過BJ深知Mark太忙,分手前所有不快依然印象難忘,佢選擇開心過後就算。

直至,竟然發現有左!由於與兩人埋牙相隔十多日,連醫生都難以確定誰較大機會是爸爸,而差不多BJ又發現果位型男原來係網絡約會紅人非常有米美國人Jack,由於都唔知邊個先係,佢決定向Jack與Mark坦白。

好喇,你可能會問:Jack又有型又有米點解會鍾意BJ?有解釋架!佢係一個相信統計學愛情既人,佢設計既程式指佢同BJ有高達97%匹配率,當然,第一次埋牙大戰多小時兩人係非常歡愉亦可能有關既。其實講到尾,喂,緣份呢家野,無得解架播,現實都見唔少筍盤既真命天女嚇死你架啦。

之後發展當然有兩男爭風呻醋的笑料,笑料不誇張但對白實在抵死,而慢慢BJ亦要面對究竟自己愛誰這個重要課題,與及兩男面對「假若個仔唔係我」的反應。

結局就不去爆喇,總之安排係非常抵死好笑,基本上若果希望入去笑,仲要重溫十幾年前英文歌,一定會開心滿足地離場。

好喇,好笑之外,劇情又點呢?其實劇情無乜特別,只不過笑料位夠密質素又不俗,當然有部份都走低俗路線但都屬英式低俗,而夾雜電視台製作就豐富電影其他支線,當中BJ新姊妹女主播非常過癮又咀賤。

演員呢?好多人擔心Renee Zellweger個樣會唔會好膠,因為未拍呢套戲之前佢出席公開場合個樣膠到唔認得,不過好好彩,呢套戲佢個樣殘得黎配合43歲既BJ,尚算自然;Colin Firth一如以往精準,與之前老老土土唔識變通既Mark Dacy一模一樣,而新男角Patrick Dempsey就係型囉,咁佢個角色都係咁,無乜野要佢發揮。客串醫生既Emma Thompson每一幕出場都好笑,同樣係因為對白與佢既演技。

其實我等年紀入場睇都有懷舊與想當年意味,不過成件事又開開心心咁囉。至於呢套戲應該好多盛女睇得好開心:試問邊個唔想四十過外單身仲可以左右逢源一個有情一個高質先?仲要有埋仔有人爭住認頭?中六合彩都無咁易啦!

不過一眾盛女請留意電影細節:BJ提出一個重點,佢仲有市場,因為佢肯keep fit,令自己望落仲嗒得杯落。所以,就算唔係個個咁好彩,最仲要都係Always get ready。

沒有留言:

發佈留言