蔣女士的偉論實在從她開始成為立法會議員之後真的是好睇過戲，不過睇直播倒是第一次。弟弟弟婦與爸爸都有在看，我們的反應都很一致，而對於第二節就能夠目擊獅吼功特別開心。當然，除了好笑之外，我們亦為這位議員的表現感到悲哀。
要了解要寫一個人，總要維基一下：蔣女士，父親為實業家蔣震，加拿大Concordia University文學學士，香港中文大學文學碩士，中國社會科學院法學博士，香港城市大學榮譽院士，太平坤士。咁果幾個傑出女性獎就唔提喇，傑唔傑出，好見人見智既。
話說昨日城市論壇蔣女士都保持儀態，當然對住果位佢親口叫人未夠秤既黃之鋒說話中係帶有不友善，咁雙方都有少少既。直至黃之鋒提出，選區議會都係公民提名產生，蔣女士就開始語無論次地講到香港永久居民同公民唔同，佢係香港永久居民提名唔係公民提名，試圖蒙混過關，不過主持謝志鋒實在睇唔過眼，最後都忍唔住兜口兜面問：咁香港永久居民提名特首你接唔接受呢？
不如，睇睇片啦，你錯過左的話：
當主持人單刀直入問，蔣女士突然發難將永久居民燒到有外國護照既鄭宇碩，當人澄清完，就再大聲夾惡向主持Fight back，話搵一個未夠秤同一個外國人點傾政制問題，點解唔請泛民議員。
睇到呢度，我以為我睇緊街市師奶唔夠人講就發癲，估唔到，呢位係立法會議員，仲要民選入去果隻。
其實此等都不能稱之為辯講技巧，此乃強詞奪理的其中一種表達，當然，若果身處選舉辯論，又或者類似電視節目直播，時間有限又唔想答對方問題，轉移視線乃其中一個方法，不過蔣女士加入個人特色，就係元秋潑婦罵街式處理，除左令人無機會插咀以聲音蓋過對方之外，更有可能令其他人耳膜受損。
蔣女士之思維邏緝一直難以理解都人所共知，你去維基一番便略知一二，而其個人面書貼出來既就更加值得大家番工悶之時去睇睇，不過，以其昨日一役，的確並非胡亂派個人出來的，是有部署的。
禮義廉派佢出來，一來比起根哥似乎有智慧少少（比較黎既嗟），二來，以佢深入民心既元秋不講理形象，就算講左乜，大家都係得啖笑，基本上好多人都唔會將其言論算上禮義廉，亦唔會將佢講既說話認真處理。
另外，派出呢位有咁獨特辯論技巧既成員，於節目途中發爛，輕而易舉地將所有焦點轉到其小丑行為，於是，黃之鋒講過乜，主持Challenge過佢乜，無人知，無人記得，成功到不得了。
每個人有每個人生存空間與原因，當我地不斷埋怨，你建制派贏硬唔該唔好派咁既質素既人出黎之時，其實除了話你知「係呀，吹咩」之外，此等奇兵自有其價值。不過，麻煩各位唔係是但投或者逢中必撐既朋友，下次投票，諗一諗，揀唔揀得落手。
蔣震先生如此受人尊重愛戴，得悉其女兒如此出眾，肯定非常激動。
沒有留言:
發佈留言