歌迷演變史

最近晚晚睇陳年十大勁歌金曲季選與總選，今個星期播放的是一九八九年，今晚看的是第二季，歌迷們還要為每個偶像組織啦啦隊即場表演，這對歌迷是極高難度的－－因為個個要見樣，無得遮住個樣。

看了幾年季選，發覺歌迷在變，那種變都好有趣。


張國榮對譚詠麟年代的季選，歌迷開始送花，但不是一大紮，而是一枝兩枝，所以唱唱下有人隊枝玫瑰，歌手照樣要老土地囉住，無計。不過更蝕底係，果個年代女歌迷好狼，上去送枝花點都要鍚番啖。咪以為以上兩位先有人咁癲，陳百強鍾鎮濤之類當然有，就連當年好紅既呂方，一樣有女歌迷殺上去錫。

人紅，真係會靚仔架！

不過當年另一經典場面，一定係節目一完歌迷衝晒上去圍偶像，場面極度混亂，一個保安都無。歌迷一樣係不斷質禮物與花俾偶像，囉出物件要簽名，當然少不了係合照啦。

難得就係當年既偶像個個都好有禮貌，從來無黑面。至少鏡頭前面。

再過幾年，花都照送，不過就不再係一枝，而係一紮。不過當時既一紮，八十年代未，就真係一紮，即係幾枝花加滿天星之類，所以偶象閒閒地攬住幾紮都仲可以唱歌，無問題。花之外，亦會送為偶像素描或者畫像，當年歌迷比較有心思，真係自製禮物，相信偶像收到都會花少少時間睇睇。

今晚第二季目擊最頂癮場面有兩個：郭小霖高唱夢中見，三名Fans殺出，其中有個成盒用花紙包好既禮物隊俾佢，果盒禮物大細肯定大過一張A4紙，厚過兩本電話簿，郭小霖當時都幾尷尬；另一經典就係：張學友先生擺晒Pose唱Cry，有印象既朋友都記得佢一唱Chorus：『Cry!』係會有指定動作，不過有三數名Fans等佢差唔多唱Chorus殺出，又係隊幾紮花俾佢，隊到佢無手渣之際，見仲有個風車想送俾學友，夾硬塞係佢隻手，然後走。

我想起陳奕迅提過，唱歌若果俾樂迷亂拍手掌破壞氣氛，倒不如唔好拍靜靜聽歌。送禮物同上，唔岩時間送，一樣破壞歌手表演，失敗！

到四大天王年代，歌迷們送一大紮花，係大紮到歌手個頭兩倍，於是，嬌小女歌手們至多收得一紮－－唔係唔想囉，而係無能為力。

相比近年，其實一樣有咁瘋狂既歌迷，不過迷既唔係本地歌手，而係外地：台灣日本韓國出口特別勁。無法子，香港藝人太易見到，已經無新鮮感，又何須對你好似對果班飛能海呢？

不過咁多個年代，呢班真金白銀支持偶象既粉絲有一共通點：依然都要遮面，依然都唔見得光。你，曾幾何時，有冇做過以上行為呢？