我的2023廿首廣東歌：下半場

咦？其實我最鍾意邊十隻都係我嘅事，但有同學走嚟DM我話快啲寫埋佢因為佢要整個Playlist跟住聽。

講真，呢十首，好難排位置，第一位更難揀。但我老土少少都要強調，廣東歌並唔係只有排行榜果批，並唔止谷到最多播放率果批，自己去Explore一下，你可能會認識同你真係click到嘅歌手音樂單位。

第十位 MIZU AGA
曲：AGA 詞：王樂儀 編：波多野裕介

做快歌唔客易，做有水準有意境嘅快歌更難。之前已經好喜歡Citypop，呢首又不一樣，波多野裕介編曲非常精準與精彩，彷彿置身日本街頭舞動，王樂儀將Mizu（即日語＂水＂）化作相信自己能夠有不同形態，再配上歌者終於開到演唱會成為Shinning star，好正！當然不能不提，Yukki主演嘅MV，Charm到不得了！

第九位 伸縮自如的愛 陳蕾
曲／詞：陳蕾 編／監：Mike Orange

樂壇社工寫情歌都有自我角度，呢首係去年我至愛陳蕾作品：Mike Orange編曲永遠可以將陳蕾作品配上最適合衣裳，首歌就係叫大家愛都要有返自我，唔好委屈自己，所以爽爽快快帶出呢個訊息就要有呢種編曲，當然陳蕾唱得入型入格而瀟灑，亦好重要。MV搵來當時一班造星仔仔，嘩，咁就咁耐喇。

第八位 Speak Love  Collar
曲：Andreas “Ndy” Jamsheree / Anna Mosten / Irma Eriksson Wadström 詞：梁嘉茵
編：Ndy 監：謝國維

COLLAR出道以來多災多難，但亦可能因為咁，佢地成員之間Bonding更強，而每首作品都有唔同嘗試亦睇住佢地多樣化與進步（形像就一時時）。呢首一出，坊間立即話：「女團就係咁丫嘛！」我就覺得嘩，甜美得來因為Serrini份詞，用上女仔都可以主動叫你示愛呢種非常媽咪嘅角度，成首歌除咗好跳好記之外亦唔會罐頭。睇住佢地每次演出跳唱都有一定水準，期待更多不一樣嘅COLLAR。

第七位 好好掛住 陳健安
曲：澤日生 詞：Oscar 編：賴映彤 監：賴映彤／陳健安

我們在失去之後，悲傷之時，總需要有人送上一碗「我懂你」的心靈雞湯。「你繼續存在縱不再能回應，心中有座城未傾倒如行星」，Oscar這份詞，On仔像是你朋友身邊的唱，在不同人心中，應該可以帶來不同的療癒。想喊就喊出嚟，然後記住，果個人，果隻寵物，果個城市，走咗，永遠在我們心中。

第六位 有錢嘅女人 Serrini
曲／詞：Serrini 編／監：Silverstrike

上年嘅媽咪出咗好多歌，款式都好唔同，但最最最深得我心一定係呢首非常GTB又有氣勢嘅！除咗果啲Mean得來又串到你應嘅詞與及非常入腦嘅曲（編曲梗係勁啦配合霸氣呀），係囉，駛乜靠人呀！

第五位 國際孤獨等級 Gareth T.
曲：湯令山／范梓謙 詞：黃偉文 編：范梓謙／葉崇恩 監：湯令山／范梓謙／葉崇恩

當時一出然後聽到，嘩大佬，呢首肯定會擊中好多人要害。我就算非常識得同自己相處，有拖拍無拖拍日子都過得好好，但人總會有孤獨嘅時候，就算你身邊有好多人。Gareth T.獨獨嘅感覺與及唔知點解佢唱呢首歌成件事好立體，的確要小心唔知幾時聽到，你會身同感受。

第四位 十年如一日 陳慧敏
曲：澤日生 詞：林夕 編：Ariel Lai 監：陳慧敏 / 澤日生 / 李雋恩

某一日聽到，好聽，慧敏哥唱得不多不少地細緻，情緒就像歌詞所提及，經歷過好一段時間，看化咗某啲事，有點無力，但還想努力。林夕這份詞，啊，我跟你跟妳跟你，走了又好留下又好，細味一下，你會多謝夕爺，又送多一份禮物給我們。

第三位 捱麵包的人 吳林峰
曲：吳林峰 詞：陳詠謙 編／監：王雙駿

在這個城市裡，越來越多人過得很不容易，甚至很苦。每個努力活著的都值得尊重，但更可怕的是曾經快樂與風光，「奢侈快樂時代無聲走過」吳林峰擁有一把好能夠將這份詞的暖唱進人的心坎，陳詠謙非常有水準的詞，我特別選了這個他一個人在維園唱的版本，那個Feel，更厲害。

第二位 *~Silencio...Shh Marf 邱彥筒
曲：INFX (ARTiffect) / Mila Alacio / French Hex 詞：藍奕邦 Rap詞：Marf 邱彥筒
編：INFX (ARTiffect) 監：T-Ma ／謝國維

就算造星果陣佢幾勁已經非常期待佢，有次佢上Music Panda擔心佢仲未掌握唱廣東歌嘅技巧，然後第一支Solo老土啲講，一鳴驚人：從曲風印度風玩最適合佢形像嘅型格跳舞加rap，邦邦仲填份咁正咁啱現代人機不離手嘅詞，再睇埋現場演出果種喂你贏晒出道好多好多年嘅歌手嘅壓台同感染力，真係一粒星嚟架播！之後幾首作品都繼續由佢主導唔打安全牌，首首都唔一樣但你又好鍾意架播，我好喜歡COLLAR都係咁話：Marf係適合單飛架！

第一位 Sorry呢度係香港Remix Billy Choi Ft. 馬太福音@TheLowMays KALAI 家麗

曲：Billy Choi 詞：Billy Choi／馬太福音／KALAI家麗 編：Eastcity 監：李一丁

乜都唔駛講，只要你繼續活於呢度，你，聽住呢首歌，就會知道有幾撚有共鳴。

Sorry呢度係香港。