我的2023廿首廣東歌：上半場

其實好早已經揀好廿五首，但一直好忙好忙，又或者，忙完，係希望好好抖抖，所以一直未有動筆。終於今晚乖乖坐埋電腦，開工。

長氣都要講：一切單純個人選擇，而自從有用KKBOX，我都會一直將覺得喜歡嘅歌放入一個Playlist，然後要揀廿首，比較有目標；另一參考，就係自己上年究竟邊啲歌聽得最多。不如講講剛剛入唔到廿大幾首作品：列車上對坐的兩個人—盧冠廷／林家謙、再見寧靜海—陳卓賢、命—藍奕邦、隱型遊樂場—張敬軒、Be Right Back—RubberBand。

又，未入正題之前，有三首係我去年新認識單位，我係幾喜歡，想特別推介嘅作品：

特別推介：活得太認真了吧  Kowloon K
曲：Kowloon K  詞：Charlie Chan 編：Kowloon K／伍卓賢 監：伍卓賢

五人本地樂隊，呢首Jazz Pop第一次聽就吸引我繼續聽落去，主音Charlie帶點娃娃聲非常remarkable，而活得太認真了吧你可以有意所指送俾某部份人聽：「怎麼都不肯看開」這句廢話給我袋，「放低陰沉走出來 改變明天可精彩」你可知什麼叫愛，唔好諗，聽聽佢，Chill一下先。

特別推介：歌手職訓101 Gordan Flanders

曲／詞：Gordan Flanders 編／監：Justin Yau／Gordan Flanders

我又唔會同你講我未聽過Godran Flanders但的確唔熟，而呢首Bossa Nova唱同編係輕鬆得來好悠然自得，其實係歌手本人想通咗點樣開心創作音樂，揮開鬱結放下惆悵，就自然地唱，歌詞認真用字（其實有少少唔係好似現代廣東流行曲），你唔理佢唱乜，都可以聽得非常舒服。

特別推介：迷失是場沒有歸程的遠行  楊智遠
曲／監：楊智遠 詞：鄭敏 編：楊智遠／Ka Shun／Machi／Guyshawn Wong 

某日KKBOX Random介紹呢首歌俾我，好簡單嘅Acoustic，聽住聽住有一種好平靜嘅感覺，人生不斷從迷失中前進，若果你覺得好煩亂，試試聽呢首歌。

第二十位 第二人格 MC張天賦
曲：吳林峰 詞：陳蕾 編／監：Mike Orange

樂壇社工陳蕾呢首詞探討人活於世又要迎合別人又想做自己，人格分裂將自己迫到絕處，吳林峰精彩嘅曲係Mike Orange主理之下暗黑壓抑，MC演繹無懈可擊，然後比一比去年小心地滑：曲詞編都高幾個層次。

第十九位 萬一你是個好人 林家謙
曲／編／監：林家謙 詞：黃偉文

有一啲歌，真係要果位歌手唱，成件事成個感覺會好立體：俾人感覺有社怨嘅渣謙，配上Wyman呢首完全量身訂造嘅詞，一邊聽一邊想起曾經交付真心卻被恨恨傷害，然後從此害怕交心認識朋友的受害人。

第十八位 房屋供應問題 Moon Tang
曲：Moon Tang／Enoch Cheng 詞：黃偉文 編：Jason Gelchen／Robbie Say 監：入屋叫人

其實上年兩首我都好喜歡，但呢首一出，嗱當事人分手係有影響嘅，但不得不讚Wyman呢份詞：將一位女生已經非常委曲求存，結果都被人置諸不理，愛啊走不了，不如你主動放棄我吧。慘，但整首歌沒有賣慘，苦中帶甜嘅唱，令人聽得更難過。

第十七位 仍有心跳脈膊 Maniac feat. Marf 邱彥筒

曲／編：Maniac 詞：顏暐宗＠Maniac 監：Maniac／Hanz／iii Iris Liu

 ”點解你地重可以返工返學，好似咩都冇發生過“，一首出色嘅電視劇主題曲，係能夠讓人一聽想起劇集，更厲害係，將當中角色劇情寫入去。記得當日Tone Music Festival睇到呢首現場演繹，全場投入果種瘋狂彷彿大家都被勾起某啲事，而Maniac與Marf現場帶出嘅震憾，功不可抹。

第十六位 路仍長 雷朋二友
曲／詞：謝千彤 編：溫翰文／Daniel Toh 監：Daniel Toh

一直仍有希望為我們帶來共鳴嘅作品，但不能否認，有部份已經對我帶唔到太多感覺，可能係仍然用類近角度唱類似嘅；而雷朋二友呢首，每次聽我都想起三個字：鬥長命。「路仍長，深呼吸，仍然相信善良在世上」好有力量，但不是硬生生的正能量，而是從歌曲一開始到最後，你會知道，她們懂，她們才可以告訴你，什麼叫鬥長命。

第十五位 Miss U Goodbye  AGA

曲：AGA 詞：何方 編：Johnny Yim 監：舒文＠Zoo Music

我第一次聽，睇住mv，眼淚係咁流。無論係失去親人，或者過去幾年我地失去朋友至愛，「何方」呢份詞，有溫度如同熟悉的填詞人，將聽歌的帶到各自最最最想念的回憶：「往事拿不起，又何妨捨棄，要放開你，才隨時能掛念你」去年演唱會（非常好睇，個人最喜歡演唱會無第一都第二）現場聽，一樣，眼淚係咁流。

第十四位 God Save The Queen 方皓玟／Mansonvibes
曲／詞：方皓玟 編：何山／Josh Yeung 監：許創基／何山

一首去年被Underated嘅電子作品：愛要講出口，你跟我遇上，女的型男的姣，火花四濺，舞池上，極樂沉淪。想起雌雄同體，想起芳華絕代，其實小明真係唔駛再唱咁多某一類作品，你，好多樣化架嘛。

第十三位 我這樣活了一天 鄭秀文
曲：永夏 詞：林若寧 編：江逸天 監：蔡德才＠人山人海／江逸天

從電影開始愛上這首歌，想起主人翁的生活日常，默默付出，平淡但滿足。這歌就可以帶給我在聽的時候一份不容易的平和感覺。最後幾句，就讓人想起電影結尾的劇情：活是每一天，和明日講聲很快見，那怕我未能實踐，你卻有漫長路線。

第十二位 日光漂白 黃妍
曲／編／監：朱芸編 詞：周耀輝

記得當日看著電影最後一幕，看著主角那種難過然後崩潰哭出來，然後雨過天青，日光漂白徐徐播出，Cath開口唱出這歌，那份溫暖與希望，是對於主角對於每位覺得生活是如此無望的觀眾，最最最需要的一份陽光。「唔好為咗做啱一件事而內疚」

第十一位 成婚破浪 謝安琪
曲：張繼聰 詞：小克 編／監：王雙駿

你知唔知有啲歌你會聽到毛管棟？張生寫俾張太，然後小克交出一份如此有練歷而情濃得化不開的詞，謝安琪唱出千帆盡過執子之手那份堅定，嘩，細水長流，漫長日子我跟你一路走下去，成婚破浪。

好，應該唔駛等好耐，頭十位，就會見街。

多謝你睇到呢度，廣東歌，仲有好多好嘢聽。